ABafana Bafana baza kudlala nelizwe elikhulu emdlalweni wobuhlobo

Oonokrawuzana
bahlebele Isolezwe (laKwaZulu-Natal) iindaba ezithi kungentsuku zatywala iSouth
African Football Association iza kusonga iingxoxo neBrazil malunga nomdlalo wobuhlobo.
Ingxeli ithi nangona kungekacaci kakuhle ngolona suku lomdlalo – kodwa wona
ungadlalwa kwinyanga ezayo. Kutshanje, iqela lesizwe lebhola ekhatywayo
eMzantsi Afrika lilaxazwe yiZambia neMadagascar ezingavumanga ukudlala nalo
ngenxa yekuhlaselwa kwabantu bamanye amazwe obekusenzeka eGoli nasePitoli
kwiphondo laseGauteng. Oonokrawuzana beSolezwe bathi iBrazil ilithakazelele
ithuba lokudlala noMzantsi Afrika ngoba nayo ilungiselela imidlalo ehlakulela
iNdebe yeHlabathi yebhola ekhatywayo eza kusingathwa yiQatar ngo-2022.

Isikhulu
seSafa kuthiwa sibona ukudlala neBrazil – ephumelele indebe yeCopa America 2019
kutshanje – njengento enokuthi incede aBafana Bafana njengokuba belungiselela
ukudibana neGhana emdlalweni ohlakulela iAfrica Cup of Nations eyaziwa nge-Afcon.
UMzantsi Afrika uthelekiswe namazwe afana neGhana, iSudan neMauritius kuGroup
C. “Njengokuba kuye kwaphanza umdlalo obuza kuba phakathi koMzantsi Afrika
neZambia okanye iMadagascar – lo nto yonzakalise iSafa epokothweni – kodwa
ngaphezulu koko, kuphazamiseke amalungiselelo weBafana Bafana. Ukudlala
neBrazil kungaluncedo kakhulu. Ukubetha iBrazil asinto esiyijongileyo –
ngamalungiselelo eyona nto ebalulekileyo kuthi,” utshilo umthombo othembekileyo
weSolezwe.

Elinye
ilizwe ekuthiwa iSafa ithetha nalo yiSwitzerland ukuba ayiphumeleli eyeBrazil
into. UMzantsi Afrika neBrazil zidlale imidlalo emihlanu. La mazwe adlala
owokuqala ngo-1996 kwiNelson Mandela Challenge emva kokuba aBafana Bafana
babephumelele iAfcon. Wabethwa uMzantsi kulowo umdlalo ngo’3-2 nangona uDoctor
Khumalo noPhilemon Masinga babefake amagowuli. Emdlalweni weConfederation Cup
[2009] phambi kweNdebe yeHlabathi, uBrazil yabetha aBafana Bafana ngegowuli
elinye eqandeni. Yaphumelela ngo’1-0 iBrazil ngo-2012 phambi kokuphumelela
ngo’5-0 ngo-2014.