Abafana Bes’thende babethwe bangcotsha yiSundowns emdlalweni weTelkom Knockout

By
Pedro Mapelo
-
Andile Jali of Mamelodi Sundowns challenges Lindokuhle Mtshali of Golden Arrows during the 2019 Telkom Knockout Semi Final match between Golden Arrows and Mamelodi Sundowns on 23 November 2019 at Sugar Ray Xulu Stadium Pic Sydney Mahlangu/ BackpagePix

Ugoduke
encumile umqeqeshi weMamelodi Sundowns, uPitso Mosimane, emva kokuba iqela
lakhe libethe Abafana Bes’thende bangcotsha ngo’2-1 emdlalweni weTelkom
Knockout obumhle eSugar Ray Xulu Stadium ngale njikalanga yanamhlanje. Amasandawana
abuyise izitya emva kokubethwa yiGolden Arrows ngo’3-2 emdlalweni we-Absa
Premiership kutshanje. Igqala leSundowns, uHlompho Kekana, litsazise igazi
kwangoko emdlalweni ngebhola yentloko ebikhatywe kakuhle nguLyle Lakay ethe
qelele. Amasandawana asithathele kuwo isiqingatha sokuqala somdlalo etyhala
ngo-Andile Jali noKekana esiswini. UGaston Sirino ufake igowuli lesibini
leSundowns emzuzwini wamashumi amathathu anesithandathu emva kokuba abadlali
beGolden Arrows bebhutyuze ibhola emhlabeni kanozinti wabo. Akukho nto ingako
enokubaliswa ngeqela ebelidlalela ekhaya ngoba kuphele isiqingatha sokuqala
liphantsi koxinizelelo.

Emva kokuba
kuyiwe kwixesha lokuphumla iSundowns inamagowuli amabini, kuye kwanyanzeleka
okokuba iGolden Arrows inyuse umxakatho. Eneneni abadlali bayo babuye badlala
umdlalo ongcono kakhulu kwisigaba sesibini. Umdlalo wabo ubidibene, bakwazile
Abafana Bes’thende ukuhlasela nokudala namathuba. UMadisha noLebusa benze
umsebenzi omhle kakhulu emva ngoba bebeqhawula iibhola engezimfake engxakini uKennedy
Mweene, obengene endaweni kaDenis Onyango, emdlalweni wanamhlanje. UMichael Gumede
ufake igowuli lokubika umdlalo usiya ekupheleni – kodwa iSundowns ikhawuleze
yaqinisa iintsika zayo ngokufaka u-Anele Ngcongca. Usompempe obephethe umdlalo,
uVictor Gomes, unike uphum’aphele uSirino ngekhadi elibomvu emva kokuba enyathele
kakubi uMatome Mathiane. Ngoku iSundowns iya emdlalweni wokugqibela weTelkom Knockout
oza kubanjelwa eMoses Mabhida Stadium kwinyanga ezayo. Iya kudlala neqela
eliphumeleleyo phakathi kweKaizer Chiefs neMaritzburg United emdlalweni
wangomso eMbombela Stadium.

 

Arrows: Sibanda, S.Dube, Sibisi, Mathiane, Nkombelo, Phiri,
Parusnath, Shitolo, Makhubela, Mtshali, Mutizwa.

Amalalela: N.Gumede, Bilankulu, L.Dube, Lunga,
Venter, M.Gumede, Sibiya.

Sundowns: Onyango, Langerman, Lakay, Madisha,
Jali, Kekana, Lebusa, Morena, Mkhulise, Sirino, Affonso.

Amalalela: Mweene, Meza, Coetzee, Ngcongca,
Maboe, Mabunda, Ngoma.

 

RELATED ARTICLESMORE FROM AUTHOR