Abafana Bes’thende bayikhabe ngesithende iKaizer Chiefs zacima izibane!

By
Pedro Mapelo
-

UNjabulo Blom weKaizer Chiefs uwiswe phantsi nguKnox Mutizwa weGolden Arrows emdlalweni weDStv Premiership obusePrincess Magogo Stadium namhlanje emalanga. Umfanekiso: Muzi Ntombela/BackpagePix

Endaweni yokuya phambili, iKaizer Chiefs ibuya umva. Oku kucace gca emva okwekati emhlophe ehlungwini emva kokuba Amakhosi ekhatywe ngesithende ngaBafana Bes’sthende zacima izibane. Badlobe okwamathole abadlali beGolden Arrows emva kokuba bebethe iChiefs ngamagowuli amabini kwelinye (2-1) emdlalweni weDStv Premiership obutaka iintlantsi ePrincess Magogo Stadium ngenjikalanga yanamhlanje. Oku kuthetha ukuthi iArrows ifumene amanqaku amathandathu onke kwiChiefs kule sizini eqhubekayo – into engafane iyifumane kwiqela laseSoweto. Abafana Bes’thende baqokelele amanqaku amane ngoku emidlalweni emibini phantsi kukaMabhuti Khenyeza noVusumzi Vilakazi abanikwe umsebenzi wokuqeqesha iqela emva kokugxothwa kukaLehlohonolo Seema kutshanje.

Amakhosi abuyela kwaNyamayipheli engciphuza kwakhona emva kokubethwa ngo’1-0 yiStellenbosch FC emdlalweni weDStv Premiership kwiveki ephelileyo. Isiqingatha sokuqala somdlalo besinika umdla kakhulu ngoba omabini amaqela ebehlasela. Amakhosi abhalise kuqala ebhodini ngegowuli elifakwe nguKhama Billiat – odlalelwe ibhola entle nguLeonardo Castro oqale umdlalo okwesibini phantsi kuka-Arthur Zwane noDillon Sheppard. Abadlali abafana noNduduzo Sibiya noSaziso Magawana bazamile ukudala amathuba – kodwa akwabikho nto ivelayo kwade kwaphela isiqingatha sokuqala iChiefs ihamba phambili ngegowuli.

Abafana Bes’thende bafumene igowuli lokulinganisa emva kokuba uNjabulo Ngcobo enze impazamo endaweni embi. USifiso Mlungwana ubhakuzelise umnatha yatsho yafumana amandla athe chatha iGolden Arrows ebibhoke isicuku kwisigaba sesibini. UMichael Gumebe ubethelele isikhonkwane esingcwabe iChiefs ngegowuli lesibini leGolden Arrows emizuzwini yokugqibela. Ukubethwa kweChiefs emdlalweni wanamhlanje kuthetha ukuthi ibethwe emidlalweni emithathu ilandelelana kwaye ambalwa nyhani ngoku amathuba okuba ifumane indawo yesibini kwiDStv Premiership xa kuphela isizini.

Golden Arrows: Mlungwana, Nxadi, Cele, Mantshiyane, Sibiya, Ndwandwe, Magawana, Dube, Mutizwa, Zuke, Mhlongo.

Amalalela: Mbaeva, Magubane, Mathiane, Ndlovu, Conco, Gumede, Dlamini, Fikizolo, Khumalo.

Kaizer Chiefs: Petersen, Ngezana, Mphahlele, Njabulo Ngcobo, Blom, Frosler, Alexander, Nlosingiphile Ngcobo, Dolly, Billiat, Castro.

Amalalela: Bvuma, Cardoso, Nurkovic, Baccus, Parker, Zuma, Radebe, Mabiliso, Sekgota.

RELATED ARTICLESMORE FROM AUTHOR