Abalandeli bakhetha ngokwabo abadlali nabaqeqeshi kwiDStv Compact Cup

By
Pedro Mapelo
-

UGqirha Irvin Khoza wePSL noMarc Jury weSuperSport ngethuba bephehlelela iDStv Compact Cup kwindibano ebiseGoli ekuqaleni kwale veki. Umfanekiso: ©Samuel Shivambu/BackpagePix

Kukho itumente entsha kraca kwinqanaba lebhola ekhatywayo eliphezulu eMzantsi Afrika, igama layo yiDStv Compact Cup. Iphehlelelwe ngusihlalo wePSL, uGqirha Irvin Khoza nezikhulu zikaSupersport ekuqaleni kwale veki ngoMvulo kwindibano ebiseGoli. Ngokwengxelo ekhutshwe yiPSL, imidlalo yeDStv Compact Cup iza kudlalwa ukusukela ngomhla wamashumi amabini anesibini ukuya ngomhla wamashumi amabini anethoba kwinyanga yokuqala kunyaka ka-2022. Yindebe ekulindeleke igcine abadlali bamaqela bexakekile kuba iza kube ilixesha lokudlalwa kwemidlalo ye-Africa Cup of Nations, eCameroon. Iqela eliphumeleleyo liza kuhamba nesigidi sonke serandi (R1-million).

UGqirha Khoza uthe into ebangele iPSL noSupersport beze nevelatanci elinje kungoba befuna ukunika abalandeli bebhola ithuba lokukhetha abadlali banike amathuba anqabileyo abadlali abadlalela amaqela adlala kwiDStv Diski Challenge. “Sivumelele singamalungu wesigqeba esilawula iPSL ukuba kufanele kubekho into enjengeDStv Compact Cup. Siyawacela ke amaqela abavumele abadlali abangayiyo kwi-Afcon ukuba badlale. Iqela ngalinye sicela likhuphe abadlali abane abadlalela iqela elidlala kwiDStv Diski Challenge. Konke oku kwenziwa ukuze bafumane ithuba lokudlala kwinqanaba eliphezulu futhi baziwe,” utshilo uGqirha Khoza.

Okuhle ngeDStv Compact Cup kukuba abadlali nabaqeqeshi baza kuchongwa ngabalandeli ngokufanayo nakwiBlack Label Cup. Ingqonyela yeSupersport, uMarc Jury, ithe babone iyinto efanelekileyo ukubandakanya abalandeli kwindebe entsha yethutyana. “Eyona nto ibaluleke ngaphezulu kwento yonke kuthi kukufakwa phakathi kwabalandeli bebhola ngoba ngabona baxhasa iDStv namaqela ngokunjalo. Ukukhetha kwabo abadlali nabaqeqeshi yeyona ndlela esibafaka ngayo kule nkqubo yethu,” utshilo uJury weSupersport. Amaqela adlala kwiDStv Premiership aza kohlulwa kane ngokweendawo akuzo ngolu hlobo:

Coastal One: Golden Arrows, Royal AM, Maritzburg United, AmaZulu.

Coastal Two: Cape Town City, Stellenbosch FC,Chippa United, Baroka FC.

Inland One: Kaizer Chiefs, Swallows FC, Orlando Pirates, TS Galaxy FC.

Inland Two: Mamelodi Sundowns, SuperSport United, Marumo Gallants FC, Sekhukhune United FC.

RELATED ARTICLESMORE FROM AUTHOR