Ibiluncumo lodwa kwiimbuso zabadlali beqakamba belali yaseSajonisi ngethuba bezilolonga nabadlali beProteas ekuqaleni kwale veki eBuffalo Cricket Stadium, eMonti.
Abantwana baseNomnandi Junior Secondary bafumene ithuba elinqabileyo ngoncedo lweKFC Mini-Cricket phambi komdlalo obuphakathi koMzantsi Afrika neZimbabwe.
Abafundi bafumene ithuba lokudlala nokufunxa ulwazi kubadlali abaziwayo kwihlabathi jikelele abafana noQuinton de Kock, uRobin Peterson noLungi Ngidi.
Njengabadlali abasakhasayo, ukudlala ngemihlana nabadlali abasemgangathweni ophezulu nokuphokozelwa ulwazi ngomdlalo weqakamba kulindeleke kwenze umahluko omkhulu njengabadlali nasebomini babo xa bekhula.
Intwazana eneshumi elinanye leminyaka, uNontokozo Mchiza, uxelele I’solezwe lesiXhosa indlela abakonwabele ngayo ukufumana ithuba lokuqeqeshwa ngabadlali beProteas.
“Kumnandi kakhulu ukudlala iqakamba. Sidibene noQuinton de Kock, uNgidi, uRoben Petersen. Bekumnandi ukudibana nabadlali abakhulu kodwa kwangaxeshanye bendingakholelwa ukuba ngokwenene ndim lo udibene nabadlali beqela lesizwe. Bathe kuthi umqeqeshi wethu usifundisa kakuhle indlela yokudlala kwaye siyakwazi ukudlala iqakamba. Mna ndakhetha ukudlala iqakamba ngoba umqeqeshi webhola yomnyazi (Netball) wayemane engabikho. Ke mna ndabona abeqakamba beziqeqesha yonke imihla.
Umdlali weProteas ophambili, uRobin Peterson uthe babavavanyile abadlali beKFC Mini-Cricket ngoba bebefuna ukuqinisekisa umgangatho wabo wokulungela ukudlala iqakamba, izakhono zabo nokuba izinto ezithile bazenza kakuhle xa bedlala.
“Ndikhumbula ndileqa abadlali abaziwayo eBhayi ndisafunda indlela ekudlalwa ngayo. Le inkqubo ikhoyo ibhetele kakhulu kwaye abantwana bafumana ithuba lokubonana nabadlali abadala bafumane iingcebiso nenkuthazo,” utshilo uPeterson emva kokudlala nabantwana.
Liyoyikisa izinga lokunyamalala kwamadoda eGqeberha!