Namhlanje umqeqeshi weqela lesizwe, uShakes Mashaba, ubhengeze amagama wabadlali abangamashumi amabini anesihlanu abazakuthi balungiselele umdlalo wokuqala kuleyo yokuzibekela indawo kwitumente yehlabathi ezakubanjelwa eRussia ngo’2018.

Umdlalo ophakathi kweBafana Bafana neBurkina Faso ungomhla wesibhozo kwinyanga ezayo e-Ouagadougou ngentsimbi yesibhozo ebusuku ngokwexesha loMzantsi Afrika.

Baliqela abadlali abatsha ababizwe nguMashaba abadlala apha eMzantsi Afrika nabanye abadlala kumazwe aphesheya kolwandle. UThobani Mncwango wePolokwane City no-Eleazar Rodgers weBidvest Wits ngabanye babadlali abathe banethamsanqa lokubizelwa kwiqela lesizwe.

UMncwango yenye yeefolosi ezithembise kakhulu kwisizini yePSL edlulileyo emva kokufaka amagowuli aliqela – logama yena uRodgers engumdlali eqhubeka kakuhle ngethuba edlalela iPlatinum Stars ayishiye ekupheleni kwesizini. Umdlali siswini odlalela iKV Oostende, eBelgium, akaqukwanga kweli qela ngenxa yokwenzakala kwakhe.

Ngomhla weshumi elinanye aBafana Bafana kulindeleke badlale umdlalo wobuhlobo nelizwe laseGhana eThekwini ngentsimbi yesixhenxe ngorhatya.

Iqela lilonke lime ngolu hlobo:

Oonozinti: Jackson Mabokgwane, Itumeleng Khune, Brighton Mhlongo.

Abadlali basemva: Ramahlwe Mphahlele, Rivaldo Coetzee, Thulani Hlatshwayo, Abbubakar Mobara, Diamond Thopola, Tebogo Langerman, Eric Mathoho, Thabo Matlaba.

Abadlali siswini: Dean Furman, May Mahlangu, Thulani Serero, Oupa Manyisa, Ayanda Patosi, Keagan Dolly, Aubrey Modiba, Mpho Makola, Hlompho Kekana.

Iifolosi: Eleazar Rodgers, Thamsanqa Gabuza, Thobani Mncwango, Sibusiso Vilakazi, Tokelo Rantie.