Ibuyile iCarling Black Label Cup kwakhona! Kweli ityeli, ibuya inochatha emva kokwenziwa kweenguqu kunaleyo yesiqhelo ebikade inamaqela amabini. Okuhle ngeCarling Black Label yalo unyaka kukuba iza kudlalwa ngamaqela amane avotelwe ngabalandeli bebhola ekhatywayo. Usuku lwangoMgqibelo lonke, abalandeli bebhola ekhatywayo baza kube bebukele amaqela amakhulu ebholeni yaseMzantsi Afrika ebulalana kwiCarling Cup engene endaweni neTelkom Knockout emva kokwenza isivumelwano nePremier Soccer League kwiinyanga ezigqithileyo. Imidlalo yonke iza kudlalelwa eFNB Stadium yodumo ukusukela ngentsimbi yethoba kusasa ukuya kwintsimbi yesixhenxe ngorhatya.
Umdlalo oza kugabula isigcawu uphakathi kwaMaZulu neMamelodi Sundowns ngentsimbi yethoba. Omabini la maqela adlala okokuqala kwiCarling Black Label. Emva kokuba iSundowns ikhutshwe yiPirates kwiMTN8, iza kulwela ukubuyisa isidima sayo. AmaZulu aya exwaye impazamo emdlalweni wangempelaveki emva kokubethwa yiBucs ngo’1-0 emdlalweni weMTN8 wokugqibela obuseMoses Mabhida Stadium kwiveki ephelileyo. Ukuzuza indebe ingayinto enkulu kuRomain Folz osaphumelele umdlalo omnye qha ukusukela oko wafika eMzantsi Afrika. Abantu abaninzi bajonge ngamehlo abomvu umdlalo oyimpinda ophakathi kwePirates neKaizer Chiefs ngentsimbi yeshumi elinambini eminimaqanda.
Ngaphandle kwamathandabuzo, umdlalo uza kutak’ iintlantsi ngoba omabini amaqela ayiphumelele imidlalo yawo egqithileyo. Ezimnyama zizithembile emva kokubetha AmaZulu kwiMTN8 kwiveki ephelileyo. Kanti wona Amakhosi azithembile nawo emva kokubetha iPirates ngegowuli likaYusuf Maart kutshanje eFNB Stadium. Kuninzi okudlalelwayo ngamaqela omabini. Ukuphumelela kweChiefs kungaphungula uxinizelelo ku-Arthur Zwane. Kanti nePirates ingakuvuyela ukuphumelela indebe yesibini kwisithuba seeveki ezimbini. Ngeke iPirates ivume ukubethwa kabini yiChiefs, ngakumbi emva kokuphakamisa indebe. Omane amaqela sele efumene izigidi ezibini zerandi (R2-m) ngokuthatha inxaxheba kwiCarling Black Label. Eliphumelele indebe liza kufumana ezinye izigidi ezibini zerandi – kodwa liza kohlulelana nabalandeli.
IPirates ibhale iincwadi zembali ngokutsha eMoses Mabhida Stadium!