Akhalela amathuba kwakhona Amakhosi!

Emva
kokudlala imidlalo emibini KwaZulu-Natal, umqeqeshi weKaizer Chiefs, uSteve
Komphela, ukhala ngelishwa lokungafumani magowuli emva kokuba iqela lakhe
libambene neFree State Stars ngo’1-1 kumdlalo we-Absa Premier Soccer League
obubanjelwe eMoses Mabhida Stadium ngale ntlwa yanamhlanje. Iqela likaKomphela
lifumene amathuba aliqela (ngokufanayo neFree State Stars) okufumana amanqaku
apheleleyo – kodwa ngelishwa icamagu alivumanga. Ekuqaleni kwale veki Amakhosi
adlale ntanganye naMaZulu FC ngeqanda macala – lo nto ithetha ukuthi ashiya
iThekwini ephethe amanqaku amabini qha endaweni yamathandathu.

Izinga lomdlalo
beliphezulu kwaye ebekhona amathuba wokufumana amanqaku apheleleyo macala.
UKomphela uqale umdlalo ngoGustavo Paez noBernard Parker phambili. Injongo yakhe
ibicacile: ebekhangela indlela yokufumana amagowuli ngoba kuphela kwento
ebinokufunqula umoya wabadlali beChiefs ekubonakalayo ukuba baphantsi
koxinizelelo. UGeorge Maluleka uphantse wayonzakalisa iFree State Stars
kwisigaba sokuqala somdlalo – kodwa zombini iibhola zakhe ziphume ecaleni
kwepali. Kuyiwe kwixesha lokuphumla kungekho gowuli emdlalweni.

Kwisigaba sesibini
somdlalo kutake iintlantsi emdlalweni emva kweenguqu ezenziweyo macala omabini.
Umqeqeshi weFree State,
uLuc Eymael, ufake uSiphelele Mthembu endaweni kaJarred Abrahams. Iqhufuze
iqanda iFree State ngebhola entle kakhulu efakwe nguNhlanhla
Vilakazi ekude. Kwimizuzu embalwa uWillard Katsande ufake elokulinganisa leChiefs.
Amakhosi aguduka entwyizisa emva kokuba iibhola zawo ezimbini zibethe epalini. Ngoku
iChiefs idlale imidlalo imidlalo yePSL ingaphumelelanga nomnye.

Kaizer Chiefs: Khune, Cardoso, Hadebe,
Ngezana, Zulu, Katsande, Maluleka, Tshabalala, Molangoane, Páez, Parker.

Free State Stars: Sangare, Mobbie,
Mbhele, Keita, Phungwayo, Masehe, Vilakazi, Dlamini, Maphakisa, Jantjie, Abrahams.