AmaBhokobhoko amkelwe ngodlwabevu lwengoma zizihlwele zabantu ngongcwalazi namhlanje eMonti

Iqela lesizwe
lombhoxo lamkelwe ngengoma evuthayo nangovuyo olukhulu zizihlwele zabantu ngongcwalazi
namhlanje emva kokugaleleka kwisikhululo seenqwelomoya saseMonti. AmaBhokobhoko
akusuku lwesibini kwiphulo lawo lokubonisa abantu baseMzantsi Afrika indebe
ayiphumelele kwitumente yehlabathi. Kwiveki ephelileyo, uMzantsi Afrika wenze
imbali ngokuphakamisa iNdebe yeHlabathi isihlandlo sesithathu emva kokubetha
iNgilane ngo’32-12 emdlalweni obuseYokohama, eJapan. 

USiya Kolisi ebetshawuza
phakathi kwamakhulukhulu abantu abadala nabantwana besikolo abebezalise
isikhululo seenqwelomoya ebesingenayo nendawo yonyathela ngenjikalanga
yanamhlanje. AmaBhokobho aza kutyhutyha-thyutyha idolophi yaseMonti neelokishi
zayo ngomso. Ibhasi evulwe ngaphezulu iza kusuka ngentsimbi yethoba ekuseni eHolweni
laseMonti (City Hall), inyathele iindawo ezifana neVincent, iDuncanVillage
nezinye ezininzi phambi kokuya eMdantsane. 

Namhlanje AmaBhokobhoko ebeseThekwini,
KwaZulu-Natal,
imini yonke. Aqale utyelelo kwiphondo laseGauteng izolo. NgeCawe aza kube
eseBhayi – apho kwazalelwa khona uSiya Kolisi. Luya kuvalwa utyelelo eKapa ngoMvulo weveki ezayo.