Emva kokungadlali imidlalo emibini ngenxa yokuhlaselwa kwabadlali yiKhorona, Amakhosi abuye ngamandla acambalalisa iSekhukhune United ngamagowuli amabini eqandeni emdlalweni weDStv Premiership obushushu eFNB Stadium ngorhatya lwanamhlanje. Amanqaku amathathu athathe iKaizer Chiefs ayilahla kwindawo yesibini ebikade ibanjwe yi-Orlando Pirates ebethe iTS Galaxy ngamagowuli amabini emdlalweni obuyizolo eSoweto. Endaweni kaStuart Baxter ophakathi kwabachatshazelwe yiKhorona, uAuthor Zwane uxhuzule imikhala namhlanje.
Uqale umdlalo ngaphandle kwabadlali abaziwayo abafana neKeagan Dolly, uKhama Billiat nabanye. Abadlali abafana noNkosingiphile Ngcobo, uSiphosakhe Ntiya-Ntiya, uThabani Dube noSiyabonga Ngezane badlale umdlalo osemgangathweni ophezulu kakhulu kwiindawo zabo. Amakhosi aye kwixesha lokuphumla ehamba phambili ngegowuli elihle elifakwe nguNkosingiphile Ngcobo. Igowuli lilandele emva komdlalo omhle odlalwe yiChiefs ukusukela ekuqaleni kwesiqingatha sokuqala.
Isiqingatha sesibini siqale kakuhle naso – kodwa iyiSekhukhune enamandla nangona ingafumananga nto. Emva kokungadlali ibhola ecacileyo kwisigaba sokuqala, abadlali bayo babuye badlala umdlalo ophucukileyo. UDaniel Akpeyi uye wanyanzeleka asebenze amatyeli aliqela – kodwa akukho bhola ebiyingozi kakhulu ayibambileyo. Abadlali abafana noThabo Rakhale noBabina Noko bazamile ukuyishukumisa iChiefs nangona bengakwazanga ukugqobhoza idonga likaDaniel Cardoso noDube emva.
Emva kokuba uZwane efake abadlali abafana noKgaogelo Sekgota, uPhathutshedzo Mange no-Eric Mathoho kwisigaba sesibini – izinto ziye zaguquka. Amakhosi abhakuzelise umnatha okwesibini ngebhola kaNange ayidlalelwe nguNgcobo noSekgota. Uphelile umdlalo kungekho nto engako ekunobaliswa ngayo iSekhukhune ngaphandle kweempazamo ezenzileyo emdlalweni. Emva kokudlala indima ebalulekileyo kuwo omabini amagowuli omdlalo, uNkosingiphile Ngcobo uchongwe njengomdlali obalaseleyo noxa engadlaliswa rhoqo nguStuart Baxter ukusukela oko kuqale isizini eqhubekayo.
Kaizer Chiefs: Akpeyi, Ngezana, Dube, Cardoso, Ntiya-Ntiya, Frosler, Blom, Nkosingiphile Ngcobo, Mashiane, Parker, Castro.
Amalalela: Bvuma, Mathoho, Nange, Mabiliso, Njabulo Ngcobo, Sekgota, McCarthy, Shabalala, Milazi.
Sekhukhune United: Nsabata, Mobbie, Maart, Motsepe, Gyimah, Katsande, Jampies, Patjie, Rakhalke, Nxumalo, Chawapihwa.
Amalalela: Kapini, Matona, Chabalala, Madonsela, Parusnath, Sithole, Molaba, Mahlangu, Sibanyoni.
Ababezenza amapolisa baphanga usapho, baqhotsa batya inyama yabo!