Amakhosi adlakaze iBloemfontein Celtic emdlalweni obutshisa eMoses Mabhida Stadium

Umdlalo obuphakathi
kweKaizer Chiefs neBloemfontein Celtic namhlanje ngomnye wemidlalo ekwakusoloko
kuthethwa ngayo kule isizini. Uwodwa nje umdlalo wanamhlanje uvelise amagowuli
asibhozo. Iifolosi zeChiefs eziyingozi, uSamir Nurkovic  noLeonardo Castro, zincede iChiefs edlakaze
iCeltic ngamagowuli amahlanu kwamathathu (5-3) emdlalweni we-Absa Premiership obutshisa
bhe eMoses Mabhida Stadium ebusuku namhlanje. Lo nto ithetha ukuthi iChiefs
isayigcinile inkabankaba yomsantsa phaya phezulu kwiPSL phakathi kwayo namanye
amaqela. Umqeqeshi weChiefs, uErnst Middendorp, uqale umdlalo ngo-Erick Mathoho
noLeonardo Castro abangadlalanga emdlalweni ogqithileyo. UNdumiso Mabena
utsazise igazi kuqala emdlaweni emva kwempazamo eyenziwe nguBernard Parker
noDaniel Akpeyi.

Akhawuleze
aphendula Amakhosi ngebhola efakwe nguSamir Nurkovic. UTchilimbou ufake igowuli
lesibini leCeltic emva kokuba uAkpeyi ecike ibhola kaMabena. Uphindile kwakhona
uNurkovic emzuzwini wamashumi amathathu ananye ngebhola ebisuka kuDaniel
Cardoso. Khange kube kudala, uSiphelele Luthulu ubeke ibhola ekoneni – yatsho yahamba
phambili kwakhona iCeltic ngamagowuli amathathu kwamabini. Amakhosi afake
amagowuli amathathu kwisigaba sesibini emva kokuba uMiddendorp efake uDumisani
Zuma endaweni kaParker kwisigaba sesibini somdlalo. Emva kokubhakuzelisa
umnatha kathathu emdlalweni wanamhlanje, uNurkovic unamagowuli asibhozo ngoku
awafakileyo emidlalweni yePSL ukuzothi ga ngoku.

Chiefs: Akpeyi, Frosler, Sasman, Cardoso,
Mathoho, Katsande, Baccus, Parker, Castro, Nurkovic, Manyama.

Amalalela: Bvuma, Maluleka,
Mphahlele, Kambole, Ngezana, Ntiya-Ntiya, Zuma.

Celtic: Mpoto, Ngobeni, Pfumbidzai,
Mahashe, Potsane, Mashikinya, Luthuli, Baloyi, Tchilimbou, Mabena, Phalane.

Amalalela: Chaine, Sera,
Letsoalo, Tani, De Jongh, Mangweni, Njoti.