Uncume kwavela nawomhlathi amazinyo uStuart Baxter emva kokuba iqela lakhe liphumelele ngendlela encumisayo eGqeberha. Amakhosi azingombele iChippa United ngamagowuli amathathu kwelinye (3-1) emdlalweni weDStv Premiership obubanjelwe eNelson Mandela Bay Stadium ngorhatya lwanamhlanje. Umdlalo uqale ngesantya esiphezulu, omabini amaqela efuna ukufaka igowuli kuqala emdlalweni. Amakhosi aye emdlalweni efuna ukulungisa izinto emva kokubethwa ngegowuli elinye eqandeni yiGolden Arrows kwiiveki ezidlulileyo phambi kwemidlalo yeFIFA.
Emva kokungakwazi ukuchitha ibhola ebigotywe nguKhama Billiat ekunene, uSamir Norkovic ubhakuzelise umnatha okokuqala kulo nyaka emva kokuchitha ixesha elide engadlali ngenxa yokonzakala. Kuyiwe kwixesha lokuphumla iKaizer Chiefs iwulawula umdlalo futhi ihamba phambili nangegowuli. Izinto zijikile kwisigaba sesibini somdlalo. Amakhwenkwe kaKurt Lentjies, ophantsi koxinizelelo olumandla ngenxa yokusokola kweChippa, abuye ekhefini elume ongezantsi. Emzuzwini wokuqala kwisigaba sesibini somdlalo, uBienvenu Eva Nga ushiye amadoda ezizigede emva kwakhe wafaka igowuli lokulinganisa leChippa United.
Banyuse umxakatho emva koko abadlali beChippa. Baxhathisile emdlalweni behlasela macala onke bezama igowuli abanokuphumelela ngalo. Nayo iChiefs ebethwe ingalindelanga iye yothuka – kodwa yaphinda yazilungisa. UStuart Baxter ufake uKeagan Dolly noCole Alexander abafike benza umahluko omkhulu emdlalweni. uDolly ufake igowuli lesibini emdlalweni emva kokuwiswa kukagxa wakhe kude kufuphi kumhlaba kanozinti. Ekuzeni kuphela komdlalo, uCole Alexander ufake elesithathu emva kokufumana ibhola entle kuNjabulo Bloem. Amanqaku amathathu othule umthwalo kuBaxter ongafunwayo ngabalandeli ngenxa yobudikidiki beChiefs kule sizini eqhubekayo.
Chippa United: Kazapua, Hanamub, Pietersen, Matrose, Mkhize, Makobela, Mdlinzo, Zulu, Sandile, Luthuli, Eva Nga.
Amalalela: Watenga, Mdunyelwa, Seabi, Maloisane, Ngele, Sekotlong, September, Mbenyane, Pfumbidzai.
Kaizer Chiefs: Petersen, Ngezana, Dube, Mphahlele, Frosler, Blom, Nange, Baccus, Parker, Billiat, Nurkovic.
Amalalela: Khune, Cardoso, Dolly, Alexander, Njabulo Ngcobo, Sekgota, Mashiane, Radebe.
USamsung ukhuphe ekhasini oomanqanqa beefowuni eziphathwayo