Amakhosi aphumelele umdlalo wesihlanu ilandelelana

By
Pedro Mapelo
-
Celebrations as Kaizer Chiefs scores during the Absa Premiership 2016/17 game between Kaizer Chiefs and Highlands Park at Moses Mabhida Stadium, Durban on 18 February 2017 © Gerhard Duraan/BackpagePix

Amakhosi ancume olukabhulankethe emva kokubetha iHighlands Park etsala nzima kwezi ntsuku ngo’1-0 kumdlalo we-Absa Premier Soccer League, eMoses Mabhoda Stadium, ngolu rhatya. Yimidlalo mihlanu ngoku ephunyelelwe yiKaizer Chiefs ilandelelana – lo nto iyithathe yayibeka enkcochoyini yePSL, inamashumi amathathu anesithathu amanqaku.

Umdlalo ububambene kwisiqingatha sokuqala ngoba iChiefs ibifuna impumelelo ukuze ibethelele indawo yayo phakathi kwamaqela aphala phambili kwiPSL – kwelinye icala, uGordon Igesund, uze namakhwenkwe wakhe kulo mdlalo enethemba lokoxutha amanqaku kwiChiefs ukuze asuke phaya emsileni wePSL. 

Isiqingatha sokuqala besilawulwa yiKaizer Chiefs ubukhulu becala, uWillard Katsande nguye obetyala iibhola kubadlali abafana noJoseph Molangoane, Siphiwe Tshabalala noBernad Parker. Kuyiwe kwixesha lokuphumla Amakhosi enkqenkqeza phambili ngegowuli elifakwe ngentloko ngumdlali wasemva uLorenzo Gordinho.

Abadlali beHighlands Park, esengxakini kwisizini yayo yokuqala kwiPSL, bawunyusile umxakatho kwisiqingatha sesibini, kangangokuba u-Itumeleng Khune uye wanyanzeleka achithe iibhola ezinzima abazithumele kuye.

Kumdlalo odlalwe emalanga, iPolokwane City ibambene no’1-1 ne-Ajax cape Town, ePeter Mokaba Stadium. Kanti yona iFree State Stars ifumene impumelelo yayo yokuqala kulo nyaka phantsi kwesandla sikaSerame Letsoaka ngokuthi ibethe iGolden Arrows ngo’1-0 kumdlalo obusePrincess Magogo Stadium emalanga namhlanje.

RELATED ARTICLESMORE FROM AUTHOR