Amakhosi anyathelela phezulu emva kokukrolonqa ngeduku iTshakhuma Tsha Madzivhandila ayibethe ngemvula yamagowuli amathathu eqandeni emdlalweni weDStv Premiership obutaka iintlantsi eFNB Stadium ngenjikalanga yanamhlanje. Impumelelo yeKaizer Chiefs yanamhlanje yeyesithathu imidlalo ilandelela emva kwexesha elide isokola. Amakhosi aphakamise umdlalo wawo kwangoko kwisigaba sokuqala.
Ngomzuzu weshumi elinethoba, uNkosingiphile Ngcobo ubhakuzelise umnatha ngebhola entle ayinikelwe nguSamir Nurkovic – oye wachongwa njengomdlali oqaqambileyo ekupheleni komdlalo. Emva koko, uGavin Hunt uye wanyanzeleka ukuba afake umdlali endaweni kaRamahlwe Mphahlele oye wonzakala. Idlale kakuhle nayo iTshakhuma Tsha nangona iibhola zayo bezingayi kuDaniel Akpeyi.
IChiefs iye kwixesha lokuphumla ihamba phambili ngegowuli elinye emdlalweni obuthande ukubarhabaxa. ULebogang Manyama, ongene kwisigaba sesibini ufake igowuli lesibini, emva kokufumana ibhola entle kuHappy Mashiane – ongene endaweni kaNgcobo okhutshwe ngenxa yokonzakala.
Idlale ngabadlali abangaphelelanga iTshakhuma ngenxa ka-Alfred Ndengane okhutshwe ngekhadi elibomvu emva kokudlala kakubi uNurkovic. UMashiane ubhalise igowuli lesithathu lomdlalo. Ngoku iChiefs ihleli kwindawo yesixhenxe, isuka kwindawo yeshumi elinambini phambi kokuphumelela imidlalo emithathu. Komnye umdlalo weDStv Premiership, iMamelodi Sundowns ibambene ngeqanda neBloemfontein Celtic emdlalweni obuseLucas Moripe Stadium.
Chiefs: Akpeyi, Moleko, Cardoso, Zulu, Mphahlele, Matsheke, Agay, Ngcobo, Zuma, Castro, Nurkovic
Amalalela: Bvuma, Parker, Ngezana, Manyama, Blom, Baccus, Sasman, Mashiane, Lesako
TTM: Arubi, Lukhubeni, Ndengane, Mabotja, Nkili, Ndlondlo, Maphangule, Theron, Rakhale, Manaka, Lamola
Amalalela: Mhlongo, Thangwane, Timm, Ravhuhali, Ngema, Monde, Nevhulamba, Mudau, Nedzamba
Ababezenza amapolisa baphanga usapho, baqhotsa batya inyama yabo!