Amakhosi enze adume ngazo kwiMacufe Cup

By
Pedro Mapelo
-
V I P's walking around the field with the Macufe Cup during the Macufe Cup match between Bloemfontein Celtic and Kaizer Chiefs on 9 October 2016 at Free State Stadium, Bloemfontein ©Frikkie Kapp /BackpagePix

Amakhosi aphinde
enza adume ngazo xeshikweni ephumelela iMacufe Cup ityeli lesithathu iminyaka
ilandelelanda ngokubetha iBloemfontein Celtic kumdlalo obukwizinga eliphezulu
eFree State Stadium ngale njikalanga yanamhlanje. IKaizer Chiefs ibethe
iSiwelele ngamagowuli amabini eqandeni (2-0) ebaleni ebeligcwele lithe qhu
ngabalandeli bebhola ekhatywayo. Amagowuli amabini afakwe ngumdlalo othe
waqaqamba emdlalweni uLebogang Manyama noDumisani Zuma – ongene kwisiqingatha
sesibini emdlalweni. USteve Komphela unike ithuba lokudlala inkitha yabadlali
bakhe abangaqhelanga kudlala kwimidlalo yePSL. Nayo iKaizer Chiefs izenzile
iinguqu kwelayo icala – kodwa kwiqela labadlali abaqale umdlalo bekukho
abadlali abafana noGustavo Paez, uGeorge Maluleka, uErick Mathoho noManyama.

Umdlalo wona
ube mhle kwasekuqaleni kwawo. Lo nto ibonakaliswe kukusukelana kwamaqela
omabini emdlalweni. Nangona iMacufe isetyenziswa njengomdlalo wokuvavanya
abadlali – iChiefs ibonakalise ukuzimisela ngokudibanisa iziqwayi zayo
zabadlali. UManyama, uPaez noWillard Katsande bebeyinto ibila kubadlali
beCeltic basemva – kodwa abakwazanga ukuwafaka amathuba aliqela abawafumenyo.
Aliqela naphoswe ngabadlali beCeltic phambi kwepali zeChiefs. Izinto zijike
ngomzuzu wamashumi amathathu ngethuba uManyama ebhakuzelisa umnatha ngebhola
eshiye unozinti ethe natya phantsi isuka kwicala lasekunxele. UJacky Motshegwa
ulifumene ithuba lokufaka igowuli lokulinganisa – kodwa ibhola yakhe ibhabhe
phezulu lee ezipalini.

Nakubeni
kungafakwanga gowuli kwiChiefs – kodwa unozinti wayo uBruce Bvuma ebexakekile
kakhulu. Emva kokuba uGiovanni Solinas efake abadlali abafana noBernard Parker,
uZuma noSiphelele Ntshangase – kuye kwakho umahluko ngoba iChiefs iye
yawulawula ngokupheleleyo umdlalo nakubeni iCeltic ibimane ukufumana loo
mingqandandana yamathuba. UZuma uvalele emnatheni igowuli lokugqibela emva
kokunikelwa ibhola entle nguParker phakathi emhlabeni kanozinti weCeltic.

 

Bloemfontein Celtic: Chaine,
Sam, Mofokeng, Motshegwa, Lingwathi, Letlabika, Maloisane, Maema, Letsoalo,
Shikweni, Nyundu.

Amalalela: Ranthimo, Mpusana, Mangweni, Mashikinya, Gordinho,
Abondo, Mabasa, Phalane, De Jongh, Mvana, Khasipe.

Kaizer Chiefs: Bvuma, Moleko, Mathoho, Booysen, Ntiya-Ntiya, Jayiya,
Mahlasela, Katsande, Maluleka, Manyama, Paez.

Amalalela: Petersen, Parker, Ngezana, Ekstein, Zuma, Ntshangase,
Zulu.

RELATED ARTICLESMORE FROM AUTHOR