AmaRashiya abethiswe kukulala kukathikoloshe izolo

Kukho ingoma
yesiNtu ethi: “Uthikoloshe way’funa umsebenzi, wasuka walala gangalala.” Le ngoma
ungothikoloshe owalalayo emsebenzi emva kokuqeshwa. Konakala izinto emsebenzini
emva kokoyisakala bubuthonga ngenxa yobude bendlela. Ngempazamo nje enye, iye
yohlwaywa kabuhlungu nayo iRussia izolo. Itumene yeFIFA esingathwe yiRussia kulo
nyaka inamacala amabini: elimnandi nelibi elikathikoloshe obeyincedisa..(Ha ha ha…). Ukusukela ngomhla weshumi kwinyanga
yeSilimela, iRussia isingathe indebe yehlabathi engenazo iziphene kwaye nezaphuselane
zayo ezidume ngekratshi nobuhlanga, ziye zazibamba. Ukuphuma kwamazwe aquka
iGermany, iSpain, iYiphutha (Egypt),
i-Argentina,
iNigeria, iPortugal, iMexico neBrazil – yeyona nto ebanxunguphalisileyo abalandeli
bebhola.

Lo nto
ibangelwe bubunganga bawo ebholeni kwakunye nabadlali bawo abazenzele udumo
kwibhola yehlabathi ngokubanzi. Nakubeni kunjalo – kodwa ukuphuma kweRussia
izolo kufane nokundila kwezulu. Akukho mntu ongakuvanga ngoba ibisoloko idlala
ngokuzimisela okukhulu kuyo yonke imidlalo yayo iRussia. Izolo ikhe phantsi
isitya sigcwele ngethuba ibethwa yiCroatia ngo’4-3 kumapenela emva kokuphela
komdlalo ibambene ngamagowuli emabini macala (2-2) eSochi. Amagowuli eRussia
ngumtshintshi ozitshintshayo uDenis Cheryshev noMario Fernandes – ofake igowuli
ngomzuzu wokugqibela engeliyophule imimoya yabadlali beCroatia ukuba bebeye
emdlalweni bengawulungelanga ngokupheleleyo. Ngelishwa lomhluzi wamanqina, abadlali
beRussia abakwazanga ukuwakhaba kakuhle amapenela emva kodmalo oqingqithe
ikhulu namashumi amabini emizuzu kudlalwa. 

Indebe yehlabathi
yenze babumbana abantu baseRussia ngakumbi futhi balixhasa ilizwe labo ngeentliziyo
zabo zonke. Lo nto ibibonakala kwiimbuso zabo xa becula umhobe wabo wesizwe
naxa bekhuthaza abadlali babo ngengoma ebaleni xa bedlala. Loo ntswahla ebinamandla
ebaleni iphelile izolo. Iphela kekambe bezamile abadlali beRussia. Ukusukela ngo-1994,
unyaka eyaqala ngawo ukudlala kwindebe yehlabathi njengeRussia emva kokuzuza
inkululeko ekuqaleni koo’90 – ibiqala ukufikela kwisigaba esinamazwe asibhozo
kwitumene yehlabathi. Njengelizwe ebelidlalela ekhaya, bekulindeleke ukuba
AmaRashiya anyamezele kude kube ngumdlalo wokugqibela. Ibinokwenzeka lo nto xa
kujongwa ukuzimesela kwabadlali, inkxaso yabalandeli – kodwa iRussia ayikho
phakathi kwamazwe anamandla kakhulu ebholeni. Indawo eyifumeneyo ifanele
kukuyamkela, ize emva koko izame ukuphucula iindawo ezithile kwindlela edlale
ngayo.

Enye yezinto
yezinto enokubabazwa ngeRussia ngumdlali wayo othe wagqama nguDenis Cheryshev –
ofake amagowuli amane kwimidlalo yendebe yehlabathi emihlanu. UCheryshev wenze
ngcono kunabadlali ebekucingelwa ukuba bangenza ngcono ekungabalwa kubo uNeymar
Jr waseBrazil, uCristiano Ronaldo wasePortugal noLionel Messi we-Argentina –
ogoduke negowuli elinye qha. AmaRashiya anokuzingomba isifuba kwakhona ngokufaka
amagowuli alishumi elinesibini kwimidlalo yayo. IRussia yavula kakuhle
ngokuvuthulula iSaudi Arabia ngo’5-0, yalandelisa
nge-Egypt eyayibetha ngo’3-1; yabethwa yi-Uruguayi ngo’3-1, kodwa eyona nto
inkulu eyenzileyo iRussia kukukhupha iSpain ngo’4-3 kumapene emva kokubambana
emdlalweni ngo’1-1. Abanye babadlali beRussia abathe bazibalula kwindebe
yehlabathi baquka unozinti, u-Igor Akinfeev, u-Artem Dyzuba, uMario Fernandes,
uYury Gazinsky no-Aleksandr Golovin.

Umqeqeshi
uStanislav Cherchesov, owamkela izigidi ezingamashumi amathathu anesixhenxe
(R37-million), uye kwi-2018 FIFA World Cup ephantsi koxinizelelo emva kokungaxhaswa
kweenzame zakhe namathandabuzo wabalandeli bebhola eRussia. Phambi komdlalo
owawuphakathi kweRussia neSpain – uCherchesov waxelela iintatheli eSamara Arena
okokuba iqela lakhe lidlala umdlalo ophucukileyo xa ethelekisa nendlela
eladlala ngayo kwi-2017 Confederations Cup eyagabulela izigcawu indebe
yehlabathi. “Sidlala umdlalo ophucukileyo xa sithelekisa nendlela esidlale
ngayo kwi-2017 FIFA Confederations Cup esazamayo kuyo. Ukudlalela ekhaya
ingayeyona nto esifunquleyo. Lo nto icacisa gca ukuba kutheni sidlala umdlalo
ongcono kunamanye amazwe,” watsho uCherchesov.

Nakubeni
kunjalo, uCherchesov uphume ebaleni izolo equthe umlomo engakwazi nokuyichaza indlela
aziva ngayo emva kokukhutshwa kweRussia.

 “Andikazazi
nokuba ndiziva njani,” utshilo uCherchesov kwinkomfa yonoondaba emva komdlalo.

Kanti naye uRoman
Zobnin – odlale kakuhle kwindebe yehlabathi uthe: “Andinanto endingayithetha,
yonke imvakalelo yam ndiyishiye ebaleni.”

Kuko konke
okwenzekileyo, abantu abaninzi baya kungqina okokuba ngokwenene iRussia
iyakwazi ukudlala ibhola ekhatywayo kwaye likhona ithemba lokwenza ngcono
kwilixa elizayo.

Russia: Igor Akinfeev, Fedor
Kudriashow, Sergey Ignashevich, Iya Kutepov, Mario Fernandes, Denis Cheryshev, Daler Kuziaev, Aleksandr

Golovin, Roman Zobnin, Alexander Samedov, Artem Dzyuba.