Umqeqeshi oyiNtloko waMavarara, uArchie Dyeli, unethemba lokuba impumelelo ezuzwe liqela lakhe ngempelaveki edlulileyo iza kukhuthaza abadlali xa bebuyela kwiABC Motsepe League.
Amavarara enze imbali ebholeni ekhatywayo ngokuzibekela indawo kumjikelo wesibini weNedbank Cup emva kokubetha iSuper Eagles emdlalweni obumhle eSisa Dukashe Stadium.
Emidlalweni elishumi elinesihlanu kwiMotsepe League, eli qela laseKomani liphumelele imidlalo esixhenxe, labethwa kwemine laze ladlala ntanganye kwemine.
Amavarara anamanqaku angamashumi amabini anesihlanu, kwindawo yokuqala kuthe ngcu iBush Bucks enamashumi amathathu anesine amanqaku kwiMotsepe League yaseMpuma Koloni.
Akukonakali nto, kodwa kunyanzelekile iqela likaMzunani Mgwigwi lizame ukuqokelela amanqaku apheleleyo phantse kuyo yonke imidlalo yalo elandelayo.
Omabini amaqela waseMpuma Koloni, Amavarara neChippa United, akwazile ukuzibekala iindawo kumjikelo olandelayo weNedbank Cup.
Ukuphumelela kweqela laseKomani yinto enkulu kubaphathi balo nakubathandi bebhola baseChris Hani ngokubanzi.
“Ndivuya kakhulu,” utshilo uArchie Dyeli, iNtloko yezoQeqesho yaMavarara.
“Kwenzeke into ekudala eyinqwenela usihlalo iqela lakhe lisadlala kwinqanaba elisezantsi. Ndiqinisekile uchulumance kakhulu apho akhoyo,” utshilo uDyeli emva komdlalo.
Nangona iqela lakhe uDyeli evumile okokuba likhe laphazanyiswa ziingxaki zangaphakathi ezibangele ukubethwa kwalo, kodwa uthe iyabonakala indima eyenziwe nguMgwigwi onikwe uxanduva lokuqeqesha ekuqaleni kwalo nyaka.
Ngoku Amavarara aza kudibana neBlack Leopards, yona iChippa United ithelekiswe neBidvest Wits.
“Ndiqinisekile, impumelelo esiyizuzileyo iza kusinceda emidlalweni yethu yeMotsepe League. Emva kokungena kwiNedbank Cup, iqela zange liqhube kakuhle kwade kwatshintshwa nomqeqeshi. Uyabonakala umahluko oko efikile umqeqeshi kwezi veki zine zigqithileyo kwaye abadlali bayabonakala ukuba bayibambile indlela afuna badlale ngayo,” utshilo uDyeli. Amavarara adibana neSpear of the Nation emdlalweni weMotsepe League oza kubanjelwa eKomani ngo15:00 ngoMgqibelo.
Imidlalo yeMotsepe League:
Lwesihlanu: Swartkops Valley United vs Sibanye United
Mgqibelo: Yaka United vs PE Stars; Birmingham City vs Mthatha Bucks; Bisho Stars vs Matta Milan; Bizana Pondo Chiefs vs Highbury FC; Bush Bucks vs Bush Pirates
Kuvulwe isikolo esixabisa iR106-million KwaMaxhama