AmaZulu aphumelele kakuhle watsho wancuma uBenni McCarthy

Uncume okosana lubona unina uBenni McCarthy emva kokuba AmaZulu equthise iStellenbosch ngo’2-1 emdlalweni weDStv Premiership obubanjelwe eKings Park Stadium emalanga namhlanje. Le yimpumelele yesibini efunyenwe ngaMaZulu imidlalo ilandelelana emva kweziphumo ezibi kwimidlalo egqithileyo. Amanqaku amathathu AmaZulu awafumeneyo awathathe awalahla kwindawo yesixhexhenxe ebibanjwe yiKaizer Chiefs ekwindawo yesibhozo ngoku phambi kokudlala ne-Orlando Pirates emdlalweni wangomso ojongwe ngameshlo abomvu ngabaninzi.

Iqela laseNtshona Koloni ebelihambele, iStellenbosch, libhakuzelise umnatha kuqala emdlalweni ngebhola entle efakwe ngu-Ashley Du Preez. UVeli Mathwa ushiyeke engazi nokuba makathini ebethwa yibhola efakwe phantsi kwakhe esithi uvalile. Emva kwesha elide kudlalwa, AmaZulu afumene igowuli lokulinganisa ngebhola efakwe yifolosi, uBonginkosi Ntuli.

Kuyiwe kwixesha lokuphumla amaqela ebambene ngegowuli elinye macala. Kwesesibini isigaba somdlalo, AmaZulu ayitshaye isaqhuma ngokufumana igowuli lesibini elifakwe nguLehlohonolo Majoro. Amathuba abekhona emdlalweno abenokusetyenziswa siStellenbosch ukuze ifumane amagowuli abenokusinika impumelelo.

Akwenzekanga oko ngoba abadlali abakwazanga ukugqobhoza kudonga laMaZulu nakuMathwa obezimisele kakhulu ezipalini. Le yimpumelelo yesithathu efunyenwe luSuthu phantsi kwesandla sikaBenni McCarthy ofike kwinyanga ephelileyo phambi kweeholide zokuphela kuka-2020. Emva kokungafumani iziphumo ezincumisayo, uMcCarthy uvakalise ukungoneliseki kwakhe yindlela abadlali bakhe abaqhuba ngayo. Njengokuba iifolosi zakhe zifaka amagowuli ngoku, lo nto imonwabisile nangani ethe akonelisekanga ncam ngumgangatho womdlalo namhlanje.

AmaZulu: Mothwa, Sikhakhane, Mabiliso, Gumede, Xoki, Makhaula, Sithebe, Mlambo, Memela, Majoro, Ntuli.

Amalalela: Mbatha, Masilela, Mzava, Khumalo, Ncube, Magubane, Mulenga, Maduna, Mthembu.

Stellies: Langeveldt, Van Heerden, Johannes, Robertson, Mthethwa, Van Rooyen, Nange, Scott, Du Preez, Dimgba, Adams.

Amalalela: Stephens, Skelem, Moon, De Goede, Brenner, Msengi, Macheke.