Anyathelela phezulu amakhwenkwe kaBenni McCarthy emva kwempumelelo namhlanje

Abalandeli bebhola ekhatywayo bonwabele omnye wemidlalo ebimihle kwaye ebinamagowuli amane onke namhlanje. ICape Town City ifumene amanqaku amathathu emva kokubetha iPlatinum Stars ngo’3-1 kumdlalo we-Absa Premier Soccer League obuseCape Town Stadium kobu busuku. Amagowuli weCity afakwe ngumakhwekhwetha womdlali uTeko Modise, u-Ayanda Patosi obekade edlala eYurophu noLetsie Koapeng otsazise igazi kuqala kumzuzu wamashumi amabini anesihlani kwisigaba sokuqala somdlalo.

Amakhwenkwe kaBenni McCarthy anyathelela phezulu ngoku emva kokuphumelela umdlalo wawo wesibini kule sizini entsha. Igowuli lokubika leDikwena lifakwe nguRobert Ng’ambi ngentloko. Lo ngumdlalo wesibini ephulukene nawo iPlatinum Stars kule sizini. Kwiveki ephelileyo ibethwe yiMaritzburg United ngo’2-0 enkundleni yayo.

Yona iMaritzburg United izibethele i-Ajax Cape Town ngo’2-0. Le mpumelelo ibeka iTeam of Choice phakathi kwamaqela aphezulu emva kokuyiphumelela yomibini imidlalo yayo. IFree State Stars idlale ntanganye ngo’2-2 neBidvest Wits kumdlalo obuseGoble Park Stadium namhlanje. Abafana Bes’thende badlale ntanganye ngo’1-1 neBloemfontein Celtic kumdlalo obusePrincess Magogo Stadium. IGolden Arrows inamanqaku amabini emva kokudlala ngokubambana ngo’1-1 ne-Ajax Cape town kwiveki ephelileyo. Nayo iBloem Celtic inamanqaku amabini emva kokubambana neChiefs ngo’1-1 kwiveki ephelileyo.