Aphele emqaleni kumqeqeshi waMabhoko-bhoko

Le ibe
yimpelaveki ekrakra okwencindi yekhala ebantwini belizwe loMzantsi Afrika emva
kokunkulwa kwamaqela elizwe amabini – iBafana Bafana naMabhoko-bhoko
ngokulandelelana. Amabhoko-bhoko abethelwe oogqirha nezicaka yi-Ireland ngo’38-3
kumdlalo obunzima kakhulu e-Aviva Stadium emva kwemini izolo. Ukubethwa kweeBoks
kumshiye engenawo amazwi ukucacisa unobangela u-Allister Coetzee. Izidlakela zabadlali
be-Ireland ziwugqagqanisele uMzantsi Afrika kwakwimizuzu elishumi yokuqala
yomdlalo. Kuyabonakala okokuba lo nto ibatheze amandla abadlali bakaCoetzee
abaye kumdlalo wovavanyo e-Ireland bephantsi koxinizelelo.

AmaBhoko-bhoko
athawuziswe emalahleni kula mdlalo atsho enza uthotho lweempazamo ezikhokelele
ekubethweni ngamapenela ngabadlali beqela ebelidlalela ekhaya. Kuyiwe kwixesha
lokuphumla i-Ireland iphala phambili ngo’14-0 ewufumene kwimizuzu engamashumi
amabini anesihlanu kwisigaba sokuqala somdlalo. Ngaphandle kwepenela efakwe
ngu-Elton Jantjies – akukho nto engako abakwazileyo abadlali boMzantsi Afrika
izolo. Umqeqeshi we-Ireland, uJoe Schmidt, uchulumance kakhulu emva komdlalo
ngoba ebefakwe imiqheliswa yabadlali abasakhulayo abathathu – uJacob Stockdale,
u-Andrew Conway noRob Herring, owazalelwa eMzantsi Afrika, badlale ngeyona
ndlela incomekayo.

“Indothusile
kakhulu indlela esidlale ngaye. Kwimidlalo yethu yovavanyo egqithileyo
ibisoloko isohlulwa ngamagowuli ambalwa kakhulu. Indlela esiwafake ngayo
amanqaku endishiye ndimangalisekile kakhulu. Sifumene amanqaku amaninzi kwimizuzu
elishumi yokugqibela emdlalweni – phambi koko, ndingatsho ukuba umdlalo
ubuzinzile,” uSchmidt.

Kwelakhe icala
uCoetzee uthe akanawo amazwi anokucacisa indlela aziva ngayo emva komdlalo. “Kunzima
ukuyicacisa le nto. Siphoxekile kakhulu kwaye siliqela ityala lokubethwa ngolu
hlobo silubeka kuthi. Iqela esidlale nalo beliphucukile kakhulu,” utshilo
uCoetzee.