Mane ngoku
amaqela ashiyekileyo naza kulwela indawo yokugqibela kwiNedbank Cup emva
komdlalo wanamhlanje. Iqela lesine ibe yiBloemfontein Celtic ephumelele
kumapenela ngo’3-2 emva kokuphuncuka kwiTS Sporting ebizimisele emdlalweni
weNedbank Cup obunzima ophele ingu’1-1 Kanyamazane Stadium emalanga namhlanje. ISiwelele
Samasele silandele ekhondweni leMamelodi Sundowns ebethe iHighlands Park ngo’1-0
emzuzwini wokugqibela izolo eMakhulong Stadium, iBaroka ebethe iBlack Leopards
ngo’1-0 emdlalweni wedabi laseLimpopo neBidvest Wits evuthulule iReal Kings ngo’4-0
emdlalweni obungoLwesihlanu. Kuye kwanyanzeleka okokuba umdlalo wanamhlanje uye
kwixesha elongezelelweyo emva kokuba iTS Sporting ifumene igowuli lokulinganisa
elifakwe nguFrancisco Muhanga.
Igowuli
lokuqala emdlalweni lifakwe nguVictor Letsoalo emva kokuba isiqingatha sokuqala
siphele kungekho nalinye iqela elikwazileyo ukubhalisa ebhodini. Nangona iSporting
idlala kwiGladAfrica Championship – kodwa iphume ixolile yindlela edlale ngayo
neCeltic ebekufanele iyibethile emdlalweni wanamhlanje. Isiwelele liqela elidla
ngokuqhuba kakuhle xa lidlala namaqela adlala kumgangatho ongazantsi – kodwa namhlanje
siphantse sagoduka siphaca eMpumalanga. Umdlalo ubunawo amathuba macala
omabini. Umqeqeshi weSporting ukhalazele ukunganikwa kweqela lakhe ipenele
acinga ukuba ngeliqabele ngayo iqela lakhe emdlalweni elidlale kakuhle kuwo. Emva
kokuba umdlalo uphele amaqela ebambene ngegowuli elinye macala, kuyiwe
kumapenela onozinti abaqhube kakuhle kakhulu kuwo – ingakumbi oweCeltic. Athelekisiwe
amaqela emva komdlalo namhlanje: iMamelodi Sundowns iza kudibana neBidvest Wits
– kanti yona iBaroka FC iza kudlala neBloemfontein Celtic emidlalweni ephambi
kwamagqibelakankqoyi.
UKhaka waseXesi wenze imbali kwiqakamba yaseMzantsi Afrika!