Rhoqo ngonyaka xa kuphela isizini yemidlalo yangeCawa, amaqela aqhube kakuhle ezilalini nasezilokishini afumana ithuba lokulwela ukuya kwiFirst Division League.
IHungry Lions yelali yaseNcerha neHome Stars yaseMncotsho ngamaqela amatsha aza kuthatha inxaxheba kwiFirst Division kwisizini ka2020 emva kokuba ekwazile ukufikelela kwisigaba sokugqibela emidlalweni.
ILions ibethe iPhozi United yaseTsholomnqa emdlalweni owandulela amagqibelakankqoyi ngelixa yona iStars iphiwe impumelelo emva kokuba iBlack Eagles yaseNxarhuni eyibethileyo kufumaniseke ukuba idlalise umdlali ongekhoyo ezincwadini kwisizini ka2019.
Umqeqeshi weLions, uAyanda Pani , uthe kudala iqela lakhe lizama ukunyukela kwinqanaba elingasentla.
“Kudala silwela ukunyukela kwaFirst Division. Ndiyayivuyela into yokuba side seza kufika,” utshilo uPani.
Ukusebenza ngokuzimisela nokuhloniphana kwabadlali nabaqeqeshi, uPani ucinga ukuba zezo zinto ezibeke iqela lakhe endaweni entle. “Intsebenziswano phakathi kweenkokheli nabadlali beqela lethu kwenze umahluko kakhulu,” utshilo.
Ephefumla ngesizini elandelayo uthe: “Into yokuqala esiza kuyenza kukwenza luqilima iqela lethu. Asizimiselanga ukuhlala phaya. Sifuna ukudlulela kwaPremier League. Ndiyayazi ukuba ngeke kube lula kodwa siza kulwa.”
Yena umqeqeshi weStars, uSimamkele Dlova, ubancomile abadlali bakhe kakhulu.
“Sisebenze ngokuzimisela ukuze sifike kweli nqanaba. Basebenzile abadlali bethu futhi ndibaqhwabela izandla,” utshilo uDlova othe uqinisekile ngokuqhuba kakuhle kweqela lakhe xa likwaFirst Division.
“Ndiyayazi ukuba siza kufika umgangatho uxhomile phaya kodwa ndiyakuqinisekisa ukuba asiyi kongeza nje inani,” utshilo uDlova.
Unobhala wombutho wombhoxo eBuffalo City, uLindela Gxalashe, ubulele bonke abantu abaxhase amaqela kwiveki ephelileyo.
Liyoyikisa izinga lokunyamalala kwamadoda eGqeberha!