Ayimkhathazi nakancinci uJomo eyokuthotyiselwa kweCosmos!

Xa kusongwa isizini yeGladAfrica Championship, iJomo Cosmos iza kuthotyiselwa kwinqanaba elisezantsi. Oku kuza kwenzeka emva kokuba iqela likaMnu. Jomo Sono livale isizini lisemsileni kwiGladAfrica Championship. Emdlalweni ogqithileyo iCosmos ibambene negowuli elinye neTS Sporting kwatsho kwaphela naloo ntlantsi yethemba yokusinda kwayo ezembeni ebikhona. Bekufuneka Ezenkosi ziyiphumelele yonke imidlalo eshiyekileyo – kodwa angayiphumeleli imidlalo yawo amanye amaqela angasentla. Yiminyaka eliqela ngoku iJomo Cosmos itsala nzima kwiGladAfrica Championship emva kokuthotyiselwa kwayo. Kudala uJomo wagxekwa ngabalandeli bebhola eMzantsi Afrika ngenxa yokuzenzela yonke into kwiCosmos.

Iqela lakhe liphakathi kwamaqela aphambili avelise abadlali abaqaqambileyo ebholeni yaseMzantsi – kodwa ngoku lisecicini lokubhanga njengokuba liza kudlala kwiABC Motsepe League enkone zizinto ezifana nobuqhophololo. Nakubeni ikamva leCosmos limfiliba, uSono uthi ayimkhathazi into yokuthotyiselwa kweqela lakhe ngoba uza kube esekhona ebholeni ekhatywayo. Njengokuba abantu abaneepokotho ezinzulu bethanda ukuthenga amaqela ukuze babuyele kwiDStv Premiership, uJomo uthi ngekhe ayenze leyo into. “Angeke ndithenge igama lelinye iqela ukuze ndibuyele kwinqanaba eliphezulu. Andinayo ingxaki nabantu abayenzayo lo nto – kodwa mna andingeke ndiyenze. Ndiya kwiMotsepe League neqela lam,” utshilo uJomo emva komdlalo ogqithileyo.

“Kutheni kufuneka ndikhutyekiswe kukuthotyiselwa? Ndiza kube ndisadlala ibhola kwiMotsepe League. Akufani naxa bekuthiwa ndiza kube ndiyindadi. Ndiza kube ndisenza into endiyithandayo. Ibhola ndingaya kuyo nokuba kuthiwa sisiwa kwelona nqanaba elisezantsi kakhulu kwaMayi-Mayi. Izinto endizenzileyo ebholeni zaziwa ngumntu wonke kwaye akukho mntu onokuzicima. Ndiphumelele iindebe ezintandathu – kodwa injongo yokuthenga kwam iHighlands Park (eyaguqulwa yayiJomo Cosmos) yayingekokulwela ukuphumelela iindebe. Ndandifuna ukuvelisa abadlali ukuze ndibathengise. Lo nto ndiyenzile kwaye ndiseza kuyenza nangoku,” utshilo uMjomana.