Nakubeni kungekho
qela elivumileyo ukugoba uphondo – amashumi amame anesithandathu awamaka
abalandeli bebhola ekhatywayo abazalise iLoftus Verfeld Stadium emalanga namhlanje
bagoduke bekholiwe ngumdlalo omhle obuphakathathi kwamaqela amakhulu eMzantsi
Afrika – iMamelodi Sundowns neKaizer Chiefs. UKhama Billiat, obedlala okwesibini
neDowns ukusukela oko wayishiyayo ekupheleni kwesizini, uchongwe njengomdlali
obalaseleyo emdlalweni. UBilliat noLeonardo Castro baphantse bayonzakalisa
iSundowns ebihexa emva amatyeli aliqela. Indlela ezi folosi ezidlale ngayo
kumdlalo wokuqala inika ithemba kuMakhosi akhangela indlela yokubuyisela
isidima sawo emva kokulambatha iminyaka emithathu yonke. Umqeqeshi weDowns,
uPitso Mosimane, uzamkele iziphumo zomdlalo emva kokuba iqela lakhe libambene
neChiefs kumdlalo wokuqala we-Absa Premier Soccer League ophele ebambene
ngegowuli elinye macala (1-1) ebhodini.
La maqela mabini
asukelene zisuka emdlalweni ebibonakala iChiefs ukuba ifuna ukubuyisa izitya
emva kokubethwa ngo’2-1 kwiShell Helix Ultra Cup kutshanje; ibilelo nelo iqela kubonakala
ukuba lifuna ukubhakuzelisa umnatha kuqala. Zitshintshile izinto kumzuzu
wesibhozo kwisigaba sokuqala; uRamahlwe Mphahlele ubeke Amakhosi phambini emva
kokubhakuzelisa umnatha ngebhola ayoxuthe kuGaston Sirino kufutshane neepali
zakhe. Kwangoko izinga lomdlalo liye lafunquka ngoba abadlali beDowns bafune
ukufaka igowuli lokulinganisa. UJeremy Brockie ufake emgibeni uDaniel Cardoso
omwise phakathi ebhokisini, usompempe uyikhombe echaphazeni ibhola ngoko
nangoko. Umdlali wasemva, iRicardo Nascimento, nguye ufake ipenela. Nngaphandle
kwamagowuli amabini afakwe kwisigaba sokuqala – kodwa enye yezinto ezithe
zaqapheleka emdlalweni kukudlalana rhabaxa kwabadlali ebaleni.
UBrockie ebeyinkathazo
kubadlali beChiefs – kodwa uErick Mathobo noCardoso bakwazile ukumelana naye
bencediswa ngu-Itumeleng Khune – oye wanyanzeleka ngamaxesha athile ukuba
anqande amanzi engena endlini. ULyle Lakay, oqale umdlalo wokuqala,
usebenzisene kakuhle kakhulu noThemba Zwane ophese ithuba lokubeka endaweni
entle iqela lakhe. UGiovanni Solinas uxolile apho akhoyo yindlela adlale ngayo
uSiphosethu Ntiya-Ntiya obedlala ekunxele emva okokuqala. Umdlalo wakhe ubumhle
kwaye ukwazile ukusebenzisana nabadlali baphabini kakuhle. Kubekho ukuphucuka
kumdlalo kaSiphelele Ntshangase kwisigaba sesibini; uSiphiwe Tshabalala
noBilliat banxulumene kakuhle noCastro ophese ithuba lokufaka igowuli
engelinike iChiefs impumelelo ejongene nonozinti kuphela.
Mamelodi Sundowns: Denis Onyango, Anele Ngcongca, Wayne Arendse,
Ricardo Nascimento, Lyle Lakay, Themba Zwane, Oupa Manyisa, Hlompho Kekana,
Gaston Sirino, Sibusiso Vilakazi, Jeremy Brockie.
Kaizer Chiefs: Itumeleng Khune, Ramahlwe Mphahlele, Erick
Mathoho, Daniel Cardoso, Siphosihle Ntiya-ntiya, Khama Billiat, Siphelele
Ntshangase, Willard Katsande, Siphiwe Tshabalala, Bernard Parker, Leonardo
Castro.
Libanjelwe isatifikethi sikaGrade 12 somgunyathi iGosa lezeMpilo