Bagutyungelwe lilifu elimnyama Abafana Bes’thende!

Ibhola
ekhatywayo eMzantsi Afrika iphantsi kwelifu elimnyama emva kokuvakala
kwesithonga sokusweleka kukaNkanyiso Mngwengwe obengumdlali weGolden Arrows
ezinze kwiphondo laKwaZulu-Natal. Ezi ndaba ziqinisekiswe liqela lakhe
ngentsasa yanamhlanje. “Iqela lebhola ekhatywayo, iLamontville Golden Arrows,
lazisa ngokubhubha komdlali walo uMnumzana uNkanyiso Mngwengwe. USgora (isiteketiso
sakhe) usweleke ngentseni yanamhlanje. Waqala ukudlalela Abafana Bes’thende
ngonyaka ka-2014. Ukusukela kuloo nyaka, udlale imidlalo elikhulu namashumi
amane kwiGolden Arrows. Ebengumdlali ozinikeleyo emsebenzini wakhe. Ukubhubha kwakhe
kushiya isithuba esikhulu ezintliziyweni zethu,” itshilo ingxelo ekhutshwe
liqela ngentsasa yanamhlanje.

Usihlalo weGolden
Arrows, uNksz. Mato Madlala, uvakaliso umothuko nokukhathazeka kwakhe. “Kundikhathazile
kakhulu ukuhamba kukaNkanyiso. Ndikhumbula esafika kwi-Arrows. Wayengumdlali
othembisayo futhi odlamkileyo. Uzenzele igama ebholeni eminyakeni edlulileyo
kwaye ndithi ngxee kusapho lakowabo,” utshilo uMadlala. Esweleka nje uSgora
ebelelinye lamajoni athembekileyo kaSteve Komphela. Konke oku kwenzeka isizini
ingekagqitywa ngenxa yekhorona. Yanqunyanyiswa yonke imidlalo ye-Absa
Premiership neGladAfrica emva komyalelo karhulumente owathi yonke imidlalo
mayihlehliswe kude kugqithe ikhorona esele yosulele abantu abasondele kwizigidi
ezihlanu kwihlabathi.