Uthe shwaka ixesha elide ebholeni ekhatywayo u-Oupa Manyisa, namhlanje uthe gqi eGqeberha kwiChippa United. Oku kwenzeka emva kokutyikitywa kwakhe yiChippa United. UManyisa, 32, ubuyela ebholeni emva kokungadlali phantse isizini yonke emva komlo phakathi kwake neTshakhuma FC othathe ixesha ngombandela wemali ekwakufanele uyifumene mhla wayekhululwa yiyo.
Phambi kokuqala kwesizini eqhubekayo, uManyisa wakhululwa yiMamelodi Sundowns emva kwethuba elide engadlali kuyo ngenxa yokonzakala okwakumkhathaza. Namhlanje wamkelwe nguDan Malesela ophantsi koxinizelelo ngenxa yeChippa United esazama ukuphepha izembe – into esele ithande ukuqheleka kuyo. UManyisa ngomnye wabadlali abadlala esiswini abasemgangathweni ophezulu eMzantsi Afrika.
Wazibonakalisa ngethuba esengumdlali we-Orlando Pirates eyakhe yazenzela imbali ngokuthatha isithathu seendebe kwisizini enye yePSL izihlandlo ezibini. Uza kwiChippa United ephethe amava awafumene emaqeleni amakhulu nakwiqela lesizwe loMzantsi Afrika. Umbuzo: Ingaba ukhona na umahluko anokuwenza emva kokungadlali ixesha elide? Akukho bani waziyo.
Konke kwakucaca ebaleni mhla enikwe ithuba lokudlala nguMalesela. Nangona etyikitywe ngokusesikweni namhlanje – kodwa yena unethuba eziqeqesha enkampini yeChippa United, eGqeberha. IChippa United iza kujongana nomsebenzi onzima wokoyisa iMaritzburg United emdlalweni weDStv Premiership oza kube useHarry Gwala Stadium ngentsimbi yesihlanu ngoMgqibelo.
Omabini amaqela ayalandelelana kwiDStv Premiersship futhi abambene nangamanqaku. Njengokuba omabini esilwela ukubaleka izembe – kulindeleke umdlalo utake iintlantsi. Yagoduka imongoza iMaritzburg United emdlalweni wokuqala kunyaka ophelileyo emva kokubethwa yiChippa – ngoku iza kufuna ukuziphindezela kowayo eMgungundlovu.
Liyoyikisa izinga lokunyamalala kwamadoda eGqeberha!