Ziintshatsheli ezivunyiweyo ze-Absa Premier Soccer League zesizini ka’2015/16 iMamelodi Sundowns. Eli lityeli lesixhenxe iDowns ibamba indebe yePSL ukusukela ngo’1996.
Oku kwenzeke nangona kusashiyeke imidlalo emibini. Lo nto ichaza ngqo indlela edlale ngayo kakuhle iSundowns kule sizini, nangona le sizini ingayiqalanga kakuhle. Iqela likaPitso Mosimane laphulukana nemidlalo yalo emibini yokuqala kodwa laswabuluka ekuhambeni kwexesha. Nomqeqeshi uyayivuma lo nto.
“Ebomini, eyona nto ibalulekileyo kukufikelela kule ndawo uyifunayo, hayi indlela oqala ngayo,” utshilo uPitso. IiBrazillians zivuthulule i-University of Pretoria ngo’3-0 kumdlalo obuseTuks Stadium ngoLwesithathu ebusuku. Onke amagowuli weDowns afakwe ngu-Anthony Laffor.
Ngulo mdlalo abadlali beSundowns abasonge ngawo umsebenzi wayo omhle wale sizini. Nanjengokuba iDowns ikhutshiwe kwiCaf Champions League neNedbank Cup kutshanje, kodwa ivala isizini ka’2015/16 kakuhle emva kokuthatha iindebe eziphambili kwiPSL, iTelkom Knockout neyePSL. Le mpumelelo imthatha uPitso imbeke phakathi kwamadoda amakhulu azenzele igama kwibhola yeli loMzantsi Afrika.
UJingles ngumqeqeshi wokuqala omnyama othathe indebe yePSL izihlandlo ezibini. Kodwa akuphelelanga apho, ngokuba le ndedeba yiyo kuphela umqeqeshi okwazileyo ukuphumelela zonke iindebe zePremier League.
Le sizini khange ibelula ngoba iDowns ibixinwe ngamaqela afana neBidvest Wits, Mpumalanga Black Aces nePlatinum Stars. Ukhahlele uJingles kwiWits ngokuyisokolisa iSundowns. “Jonga, siyithathile le nto kodwa ukhuphiswano belunzima kakhulu.Bebephikisana nathi – bezikhamana. UGavin Hunt uneqela elihle kakhulu – kodwa simbethe ngoba besiphumelela imidlalo rhoqo kwaye sifaka amagowuli,” utshilo uPitso. Izolo uPitso nomdlali wakhe ophambili uKhama Billiat bathiwe jize ngamawonga yiPSL njengababalaseleyo kwinyanga ephelileyo.
Ukwakha iqela kuthatha ixesha elide, utsho uBobby Motaung