Umqeqeshi weqela lesizwe lebhola ekhatywayo, uMnu. Hugo Broos, ukhwele ezehlela ebholeni yaseMzantsi Afrika athe ayinabo abadlali abasemgangathweni. Oku kuthethwe nguBroos kwintlanganiso ebizinyaswe ziintatheli eGoli izolo. Iintetha zomqeqeshi zikaBroos zilandela emva kokuba aBafana Bafana bebethwe yiMorocco ngamagowuli amabini kwelinye (2-1) emdlalweni ohlakulela iAfrica Cup of Nations obubanjelwe eRabat kwiveki ephelileyo. UMzantsi Afrika, iMorocco neLiberia zikhuphisana ngeendawo ezimbini kuGroup K zamazwe aza kuya kwiAfcon emva kokurhoxiswa kweZimbabwe.
“Lifikile ixesha lokuba sithethe ngeyona nto eyingxaki,” utshilo uBroos emva kokubuya ephoxekile eMorocco. “Yintoni eyona ngxaki? Asinabo abadlali abasemgangathweni ophezulu njengamazwe afana neGhana, iFrance neMorocco. Abadlali beGhana neMorocco badlala eYurophu, unozinti wayo (iMorocco) ebedlalela iRaja Casablanca kutshanje.
“Asinabo apha eMzantsi Afrika abadlali abadlali eYurophu. Singajonga kubadlali beMamelodi Sundowns abadlale kwiCAF Champions League nakwi-Orlando Pirates edlale iCAF Confederation Cup – kodwa omabini loo maqela abethwa. Ndiyaphinda, kumaqela endiwakhankanyileyo, bebengekho abadlali abaninzi ebebekhona ngoku besidlala neMorocco ngaphandle kukanozinti weRaja Casablanca.
“Kwakhona, ndifuna ukuyigxininisa into ethi ingxaki ejongene noMzanti Afrika kukuba abekho abadlali abasemgangathweni ophezulu. Izinga lePremier Soccer League alikho phezulu ngokwaneleyo,” utshilo uBroo. Abantu abaninzi batsarhiwe kakhulu yintetho yendedeba yaseBelgium abayichaze njengomntu odelelayo. Oku ukuthethe uBroos nangona iSundowns, iChiefs nePirates ziqhube kakuhle emidlalweni yeCAF nakubeni zingabuyanga nandebe. Njengokuba uMzantsi Afrika ubuye nelize eMorocco, ngoku unethemba lokubetha iLiberia emidlalweni emibini udlale ntanganye komnye ukuze uye kwiAfcon elandelayo.
Ifunyenwe indoda yaseTshayina eyayixhwilwe, kwabanjwa abarhanelwa abathathu