Hugo Broos: Senze inkqubela ebonakalayo kule veki

By
Pedro Mapelo
-

UPercy Tau weSouth Africa noGideon Mensah weGhana emdlalweni ohlakulela indlela eya kwindebe yehlabathi ka-2022 obuseFNB Stadium ngorhatya ngoMvulo. Umfanekiso: Muzi Ntombela/BackpagePix

Kugquba umoya omhle kwandlunkulu weSafa emva kokuba iqela lesizwe lebhola ekhatywayo liphumelele umdlalo obalulekileyo ekuqaleni kwale veki. UMzantsi Afrika wenze imbali ngokubetha iGhana ngo’1-0 emdlalweni obumhle eFNB Stadium ngongcwalazi ngoMvulo. Igowuli abaphumelele ngalo aBafana Bafana lifakwe nguBongokuhle Hlongwane – isiququ sefolosi esidlalela iMaritzburg United. Kanti kwiveki ephelileyo ngoLwesihlanu, uMzantsi Afrika ubambene neqanda neZimbabwe emdlalweni obuseHarare emalanga. Imidlalo kaGroup G yomibini edlalweni nguMzantsi Afrika ihlahla indlela eya kwitumente yehlabathi (Fifa World Cup) eza kusingathwa lilizwe laseQatar kunyaka ozayo. Nangona ukuya eQatar ingasiyiyo into esemqoka kuHugo Broos njengokuba ezama ukwakha iqela elitsha – kodwa uzingomba isifuba ngomsebenzi owenziwe ngabadlali bakhe ekuqaleni kwale veki.

Bongokuhle Hlongwane of South Africa celebrates goal during the 2022 World Cup Qualifier match between South Africa and Ghana on the 06 September 2021 at the FNB Stadium, Johannesburg ©Muzi Ntombela/BackpagePix

Ebeqala ukuxhuzula imikhala njengomqeqeshi waBafana Bafana, ngethamsanqa ukwazile ukuqokelela amanqaku amane emidlalweni emibini. “Ndiyavuya futhi ndiyaziqhenya ngento endiyibone isenziwa liqela lam ebaleni namhlanje,” utshilo uBroos emva kokuba iqela lakhe loyise iGhana enomkhwa ombi wokuthanda ukuwusokolisa uMzantsi Afrika. “Senze inkqubela ebonakalayo evekini nje enye. Into endiyiqapheleyo ngokuya iqela belidlala eZimbabwe kukuba abadlali bebengazithembanga futhi ibingekho intshisakalo yokuphumelela. Kodwa into endiyibone emdlalweni wanamhlanje yahlukile. Sidlale umdlalo omhle kakhulu ngokuzithemba. Ndibone iqela elidlalela ukuphumelela futhi eliziqoqoshileyo kakhulu. Sifumene amanqaku amane endaweni yamanqaku amathandathu.

“Ezintsukwini ezidlulileyo bendithe, ukuba singafumana amanqaku amane, ndakuvuya – kodwa bekufanele siyibethile iZimbabwe saze sadlala ntanganye neGhana. Kwenzeke izinto eziphambeneyo kwaye ayindiphathi kakuhle lo nto,” utshilo uBroos. Kwinyanga ezayo, uMzantsi Afrika uza kuqubisana neTopiya (Ethiopia) emidlalweni emibini kwaye kufuneka uphumelele ukuze wandise amathuba okuya eQata. “Sakubona ukuba sakuhamba kangakanani xa kuphela ugqatso. Kufuneka banikwe ithuba lokudlala abadlali abasakhulayo. Xa be benganikwa, amava baza kuwathatha phi? Umzekelo: uEthon Brooks udlale kakuhle kakhulu namhlanje. Kwiinyanga ezizayo siza kubona abanye abadlali ithuba lokudlala. Ukuba lo nto ingaphumelela, ndingavuya ngoba yinto endifuna yenzeke apha eMzantsi Afrika,” utshilo uBroos. UMzantsi Afrika uthe ngcu phezulu emva kokubethwa kweZimbabwe ngo’1-0 yiEthiopia.

RELATED ARTICLESMORE FROM AUTHOR