Elinye
lamaqela amadala ebholeni yaseMzantsi Afrika, iBidvest Wits, lithengisiwe.
Ngenjikalanga yayizolo, iTshakhuma Tsha Madzivhandila ithe ithenge iWits kwaye
yonke into sele icalanye. Sekuziiveki ezimbalwa kuvakele iindawo ngokuthengiswa
kweBidvest Wits noxa abalawuli bayo bavele badla imu. Kukhangeleka ngathi iWits
nosihlalo weTshakhuma Tsha, uMnu. Lawrence Mulaudzi, bavumelene ezintsukwini
ezigqithileyo ngexabiso okukhokelele okugqibeleleni kwentengo yeqela. Iingxelo
zithi iBidvest Wits iza kuzinza eThohoyandou, kwiphondo laseLimpopo, emva koko
iguqulwe igama ibe yiTshakhuma Tsha Madzuvhandila kwisizini ezayo. Yona iTshakhuma
Tsha liqela elidlala kwiGladAfrica Championship. IWits ibiza kufinca iminyaka elishumi kungekudala.
“Ngokusesikweni
singatsho sithi iTshakhuma Tsha Madzivhandila liqela eliza kudlala kwiPSL emva
kokuthenga iBidvest Wits nabadlali bayo,” itshilo ingxelo ekutshwe yiTTM
kumakhasi wayo onxibelelwano afana noTwitter noFacebook. Kwelinye icala, iTshakhuma
Tsha edlala kwiGladAfrika Championship sele ithengisiwe. Umba weWits usafuna
ukutyikitywa yiPSL phambi kokusongwa kwesizini esamisiweyo ngenxa yekhorona. Akukho
zinzo enkampini yeWits ngoku. Kuvakala into ethi uGavin Hunt nabadlali abahlanu
abamkela iimali ezinkulu baza kuthengiswa okanye bakhululwe ukuze baye kwamanye
amaqela. Abadlali abafana noThulani Hlatshwayo, uDeon Hotto, uS’fiso Hlanti
nabanye bafunwa ngamaqela aquka i-Orlando Pirates neMamelodi Sundowns.
URamaphosa uyiqhwabele izandla iEPWP encede abantu abaninzi