IBucks iphumelele kwiNedbank

Ebexhwithana amaqela eNational First Division (NFD), ngoLwesibini kwimidlalo yokulwela indawo kwindebe yeNedbank yalo nyaka. UMthatha Bucks ukhe waguqula izinto, walibala ngokuqhuba kwawo kakubi ngethuba ubetha iCape Town All Stars ngamagowuli amabini eqandeni, eMthatha Stadium.

IBucks inkqonkqoze kuqala xa ifaka igowuli ngomzuzu wesithandathu uqalile umdlalo, ngegowuli elifakwe nguSiphelele Jonasi. Igqala kweli qela uMoses Spandeel ufake igowuli lesibini isesisiqingatha sokuqala. ISantos yona iziphindezele kwiWitbank Spurs xa ibetha eli qela ngamagowuli amabini eqandeni ePuma Rugby Stadium. ISantos ifake igowuli lokuqala phambi kokuba kuyiwe ekhefini, ngonyawo lakaBrent Adonis. Kumdlalo weMilano United kunye neHighlands Park,

amagowuli amane afakwe nguMothobi Mvala, uThando Mdluli, uRichard Matloga kunye noRyan Rae. La magowuli ngawo ancede iHighlands Park ukuba ibethe iMilano United kwawayo amathathu eMakhulong Stadium. AmaZulu nawo azibonakalise ubukhulu kule midlalo yeNedbank xa ezibethela iThanda Royal Zulu, ngamagowuli amane kwelinye. Amagowuli amabini okuqala afakwe kwimizuzu engamashumi amabini nguBornwell Mwape kunye noTshepo Liphoko, uGoodman Dlamini uye wafaka elesithathu.

IBaroka FC ibethe iRoyal Eagles ngegowuli elinye eqandeni, kumdlalo ubudlalelwa e-Old Peter Mokaba Stadium. IMoroka Swallows nayo izibonakalisile ukuba isuka kwiPSL, ibethe i-FC Cape Town ngamagowuli amane eqandeni. Lo mdlalo ubudlalelwa eDobsonville.