iCape Town Spurs ikhangela ifolosi emva kokonzakala kukaRadiopane

Iqela laseNtshona Koloni, iCape Town Spurs, likhangela ifolosi entsha ngenxa yokungakwazi kwalo ukufumana amagowuli. Ukusukela ekuqaleni kwesizini, iSpurs sibethwe emidlweli yonke yeDStv Premiership. Kuloo midlalo, iqela laseKapa lifake igowuli elinye tshu. Ayimphathanga kakuhle into yokunqaba kwamagowuli uShaun Bartlett kufanele ngoku ukhangela ifolosi enokunceda iqela lakhe kungekonakali kakhulu. Okwenza kube kubi kakhulu kukonzakala kukaBoitumelo Radiopane – ifolosi ebixhathise ngayo iCape Town City xeshikweni isadlala kwiMotsepe Foundation Championship kwisizini ephelileyo phambi kokunyuselwa kwayo. “Singakhangela ifolosi ekwaziyo ukufaka amagowuli – into efunwa ngabaqeqeshi bonke kweli lizwe,” utshilo umqeqeshi kwiSABC Sport.

“Akekho umdlali ofumanekayo apha eMzantsi Afrika ngoku. Kunyanzelekile ukuba sijonge kwamanye amazwe,” utshilo uBartlett emva kokuba iqela lakhe liguqiswe phantsi yiPolokwane City ngamagowuli amathathu kwelinye emdlalweni obusePeter Mokaba Stadium kwimpelaveki egqithileyo. “Ngeke abonakale uRadiopane kude kube sekuqaleni konyaka ozayo ngenxa yokonzakala okubi akufumeneyo. Wenziwe utyando kutshanje. UGqirha uthi uza kuhlala iinyanga ezintathu ukuya kwezintlanu ukuze aphile ngokupheleleyo. Kuthi ufana nongekhoyo kwisigaba sokuqala sesizini,” utshilo uBartlett. Baninzi abadlali abatyikitywe yiCape Town City phambi kokuqala kwesizini – kodwa akukho mdlali onamava noyifolosi enokuthembela kuye ekwazileyo ukumfumana.

Njengokuba iSpurs sisakhangela ifolosi, kwelinye icala sifumene umdlali wasemva osuka kwiMamelodi Sundowns. Igama lakhe nguNicholas Lukhubeni obekubolekiswe ngaye kwiSwallows kwisizini ephelileyo. Noxa engekadlali kule sizini – kodwa kulindeleke ukuba uLukhubeni ayincedisa kakhulu iCape Town Spurs enabadlali abaninzi abaqalayo ukudlala kwiDStv Premiership. Iqela likaBartlett liza kuzama ukufumana impumelelo yalo yokuqala xa lidibana neChippa United emdlalweni weDStv Premiership oza kube uAthlone Stadium ngorhatya ngoLwesihlanu. Omabini amaqela aza kuya emdlalweni efuna impumelelo ngoba akakaphumeleli kule sizini noxa iChippa inawo amanqaku amabini ewafumene emidlalweni yayo. UMorgan Mammila uza kulwela ukuyibetha iCape Town Spurs esokolayo ukuze aphungule uxinizelelo emagxeni wakhe.