IKaizer Chiefs kufuneka iqokelele iingceba ilungise apho konakele khona kwimidlalo edlulileyo xa indwendwela iFree Stars kumdlalo wePremier Soccer League, eGoble Park ngokuhlwa namhlanje.
Amakhosi khange adlale kakuhle kwimidlalo emibini edlulileyo yePSL. Aqale abethwa yiMamelodi Sundowns ngamagowuli amathathu kwelinye, phambi kokuba adlale ntanganye ngeqanda macala kumdlalo neBloemfontein Celtic kwiveki ephelileyo.
IChiefs ihleli kwindawo yesine kwiPSL, ishiya iBlack Aces ngamanqaku amabini. Izakube idlala ngaphandle kwabadlali ababini bangemva uKeagan Ritchie noLorenzo Gordinho, abathe babekelwa bucala kumdlalo wanamhlanje.
IFree State ehleli kwindawo yeshumi elinanye kwiPSL, nayo izakube idlala ngaphandle kwabadlali ababini uJustice Chabalala noLucky Mohomi.
IiStars zidlale ntanganye ngegowuli elinye macala kumdlalo ubuphakathi kwazo nePlatinum Stars ngoMgqibelo. Kumdlalo womlenze wokuqala phakathi kwala maqela mabini, iChiefs yabetha iiStars ngamagowuli amane eqandeni.
IChiefs ayikwazanga ukukhusela intshinga yePSL kule sizini, yahluthwa yiMamelodi Sundowns kwiveki ephelileyo. Ngoku iChiefs ilwela ukuhlala kwindawo yesithathu, izokuqala kwindawo entle kwisizini ezayo.
Into akwazileyo ukuyenza uKomphela kule sizini kukukwazi ukugcina iChiefs phakathi kwamaqela asibhozo aphezulu.
IChiefs khange iyiqale kakuhle le sizini, kwaye iphinde yaphulukana namanqaku amaninzi nangoku sele isondele ekupheleni.
Ukuba iChiefs ingakwazi ukuqabela phezu kwePlatinum Stars esentla kwayo ngamanqaku, ingasethubeni lokuba idlale kwitumente yeCAF.
Kuvulwe isikolo esixabisa iR106-million KwaMaxhama