Abaphathi beChippa United abaxhalatyiswanga kukuxinga kweqela labo kwimidlalo ye-Absa Premier Soccer league, endaweni yoko, bavakalise inkxaso epheleleyo kwiqela lonke nakubaqeqeshi phambi komdlalo weNedbank Cup ongenjikalanga yanamhlanje.

Ngokungafaniyo nesizini edlulileyo, iiChilli Boys aziqhubi kakuhle kule nangona kusekho intlantsi yethemba lokuya kumjikelo olandelayo kwiNedbank Cup. Eli qela laseMpuma Koloni livuthululwe yiCape Town City ngo’4-1 kumdlalo wePSL ngoMvulo wale veki e-Athlone Stadium. Ukubethwa kwayo kula mdlalo akuzondaba ezimnandi ngoba lo nto iyisondeze kumaqela azama ukusinda ezembeni. IiChilli Boys zagqibela ukuphumelela umdlalo wePSL mhla zazibetha iBaroka FC enkundleni yazo iNelson Mandela Bay Stadium. Ngoku iChippa ihleli kwindawo yeshumi emva kwamashumi amabini anesibini emidlalo.

Kuzo konke okwenzekileyo, abaphathi beChippa United bathi baqinisekile ngokuphunyezwa kwezibhambathiso ezenziwe liqela ekuqaleni kwale isizini. “Siqinisekile ukuba abaqeqeshi nabadlali bazakuthi bakwazi ukuzenza izinto ebesizibekele zona ekuqaleni kwesizini ka’2016/17. Kuyakhuthaza ukubona abalandeli belixhasa iqela labo,” itshilo iChippa United kwikhasi layo lomnatha.

Umdlalo wokugqibela kwibala layo kwinyanga ephelileyo, iChippa United ibethe iWitbank Spurs ngo’2-1 kwiNedbank Cup, namhlanje yamkela iPolokwane City kumdlalo weNedbank ngo’15:00 kwalapha eNelson Mandela Bay Stadium.

“Simema bonke abalandeli ukuba beze ngobuninzi bazoxhasa iqela labo njengokuba lizimisele ukwenza imbali ngokuthi liye kumjikelo olandelayo wokhuphiswano ukusukela ngo’2010,” itshilo iChippa kwikhasi lomnatha.

Lo mdlalo ubalulekile kakhulu kwiChilli Boys ngenxa yalo mbali enokuthi yenzeke – kodwa kwelinye icala ungalola abadlali ukuba bafumana impumelelo. Iyasokolisa ke iPolokwane City futhi nayo ikhangela impumelelo engatshintsha imeko yayo engencumisiyo kwiPSL.