Ifumene amanqaku aphelele iChippa United namhlanje. Oku kwenzeke emva kokuba ibethe iTS Galaxy ngamagowuli amabini kwelinye emdlalweni weBetway Premiership obubanjelwe eNelson Mandela Bay Stadium, eGqeberha.
Amagowuli ephumelele ngawo iChippa afakwe nguEva Nga Bienvenu naye uAyabulela Konqobe. Kule sizini eqhubekayo, iChippa United iphumelele umdlalo wayo wesibini namhlanje. Yavula isizini ngoswazi lePirates – kodwa yavuka ngeRichards Bay, eMonti.
Amaqela ebezimisele ukuwuphumelela umdlalo ngoba asukelene kwa kwisigaba sokuqala somdlalo. Kuyiwe kwixesha lokuphumla amaqela ebambene ngegowuli elinye macala. UBienvenu ubhakuzelise umnatha kuqala emzuzwini wamashumi amathathu anesine.
Waphendula uDzenan Zajmovic emzuzwini wamashumi amane phambi kokuphela kwesiqingatha sokuqala. Kwisigaba sesibini, iChippa iyigubungele iTS Galaxy ngegowuli elize noKonqobe kwisigaba sesibini somdlalo wanamhlanje. Amanqaku ewafumene namhlanje iChippa United ayibeka kwindawo yesine kwiBetway Premiership. Inamanqaku asixhenxe ewafumene emidlalweniemine kule sizini.
Ukubethwa kanye kweChippa emidlalweni emine kuyinika ithuba lokulwela indawo ebhetele ngokomnqweno wakhe uKwane Kopo ongumqeqeshi wayo. Kanti kuyo iTS Galaxy kusenzima kakhulu ngoba ayikaphumeleli nakanye emidlalweni emithathu eyidlalileyo. Isiqalo esibini besilindelekile emva kokuthengisa abadlali abaninzi abaquka uMojela phambi kokuqala kwesizini entsha.
Lumka Oliphant: ‘Yekani utywala’