Iqela
laseMpuma Koloni elidlala kwiPSL, iChippa United, likhangela umqeqeshi omtsha
emva kokuba ligqibe kwelokuba limkhulule uRhulani Mokwena obengumqeqeshi obambeleyo.
Ekuqaleni kwalo nyaka, iChippa yabolekwa uMokwena yi-Orlando Pirates idinga
emva kokuhamba kukaNorman Mapeza owamka engabhugisanga. Isivumelwano phakathi
kwala maqela amabini ngoMokwena sathi uza kuhlala eBhayi kude kuphele isizini.
Isizini iye yaphazanyiswa kukuqhambuka kwekhorona esiphakathini senyanga
yoKwindla. Namhlanje iChippa United yothuse umzi ngethuba ivakalisa iindaba
ezithi igqibe kwelokuba ingasihlaziyi isivumelwano sayo noRhulani Mokwena.
Akukho sizathu esicacileyo esikhankanyiweyo esibangele iChippa ikhethe
ukugqibezela imidlalo eshiyekileyo ngaphandle komqeqeshi.
“Ngenxa
yokungaqiniseki ngesibhengezo ebesiza kwenziwa nguMphathiswa uNathi Mthethwa,
iqela belingaqinisekanga ukuba kwakuphinda kudlalwe nini. Oomanejala bakaMokwena
bebesileqa ngombuzo ongekamva lakhe. Kuye kwanyanzeleka sibaphendule.
Sibaxelele okokuba iqela ligqibe kwelokuba abuyele kwiPirates,” utshilo
umphathi weChippa, uLukhanyo Mzizi, ethetha nephephandaba laseBhayi, iThe
Herald namhlanje. Nangona iChippa iye yaqhothoza emva kokufika kukaMokwena –
kodwa zange kubekho zinzo ncam emva kokukhululwa kwabadlali abadala abaquka
u-Andile Mbenyane noKurt Lentjies. Ngoku abaphathi beqela baza kukhangela
umqeqeshi omtsha oza kugqibezela isizini okanye baza kukhangela umntu oza kuba
libambela kude kuphele isizini ekunokwenzeka iqale kwinyanga ezayo.
Liyoyikisa izinga lokunyamalala kwamadoda eGqeberha!