IChippa United iyibeke endaweni yayo iTS Galaxy emdlalweni weNedbank Cup

Ngelishwa
layo, iTS Galaxy ayikwazanga ukuyikhusela indebe yeNedbank emva kokuba ibekwe
endaweni yayo yiChippa United emdlalweni obunomtsalane eNelson Mandela Bay
Stadium ebusuku namhlanje. Amakhwenkwe kaDan Malesela aba ziintshatsheli
zeNedbank Cup kunyaka ophelileyo emva kokubetha iKaizer Chiefs ngo’1-0
emdlalweni wokugqibela eMoses Mabhida Stadium owashiya iintliziyo zabalandeli
bayo (iChiefs) ziziingceba. IChippa United, ebiphantsi koxinizelelo phambi
komdlalo ngenxa yokubethwa kwayo emidlalweni emibini egqithileyo, ivuthulule
iTS Galaxy ngamagowuli amathathu eqandeni (3-0) emdlalweni wokuqala weNedbank
Cup kulo nyaka. Umqeqeshi weChippa, uNorman Mapeza, ebengakholelwa engaphandle abadlali
bakhe besoyiswa kukusebenzisa kakuhle amathuba ebaleni kwisigaba sokuqala
somdlalo. Ifolosi yaseNigeria, u-Augustine Kwem, ebeyifun’ apha ibhola – kodwa oogxa
bakhe bebengakwazi ukumnika iibhola eziphucukileyo.

Idlale
kakuhle iGalaxy, ibhola ibiyibeka phantsi njengesiqhelo, isiya phambili – kodwa
iifolosi zayo bezibuthuntu. Izinto zijikile kwisigaba sesibini. Abadlali
beChippa bawuthathele kubo umdlalo bakubona okokuba ingabonzakalisa iTS Galaxy
ebe kubonakala okokuba ikhangela igowuli enokuthi iphumelele ngalo umdlalo. Emzuzwini
wamashumi amathandathu anesithathu, uRuzaigh Gamildien ufake igowuli elihle
ekude. Ligowuli elo elithe labanika amandla abadlali beChippa United ngakumbi.
UKwem ufake amagowuli amabini wavalwa umkhusane. Ngalo ndlela yaba iyaphela
indlela yeTS Galaxy kwiNedbank Cup eyayinika udumo nethuba lokudlala kwiCAF
Confederation Cup okokuqala kwimbali yayo. Imizamo yabadlali abafana noSizwe
Mdlinzo noKhayelihle Shozi ayikwazanga ukulihlangula iqela likaDan Malesela kwiqela
awayefudula eliqeqesha kwiminyaka edlulileyo. Impumelelo iza kubuyisela ukuzithemba
kubadlali beChippa abasebenzela ukuphepha izembe kule sizini.

Chippa: Mothwa, Modisane, E.Moyo, Mthethwa, K.Moyo, Mahola,
Komane, Lebitso, Jodwana, Gamildien, Kwem.

Amalalela: Mazibuko, Maziya, Damons, Baartman,
Lentjies, Maphangule, Rakhale.

Galaxy: Mpakumpaku, Mashifana, Mashego, Dube,
Aubass, Barns, Nduli, Mdlinzo, Ndlovu, Mathonsi, Chaine

Amalalela: Morake, Matlala, Shozi, Khumalo,
Mahlangu, Shangase, Mandawa