IChippa United iyifun’apha iSundowns eyingozi

Umqeqeshi weChippa United, uMorgan Mammila, akanalo nelincinci ixhala njengokuba iqela lakhe lilungiselela ukudibana neMamelodi Sundowns ngempelaveki. “Mabeze sibalindile,” utshilo uMammila emva kokuba iChippa United ibambene ngegowuli elinye ne’Orlando Pirates emdlalweni weDStv Premiership obuseNelson Mandela Bay Stadium kubusuku bangoLwesibini. Igowuli elifakwe nguGoodman Mosele lihlangule iChippa ebihamba emva kwiPirates etsazise igazi kuqala kwisigaba sokuqala somdlalo ngebhola efakwe nguBandile Shandu. Emva kokungabethwa yiKaizer Chiefs nePirates, iChippa ifuna iSundowns igqibe ngamaqela amakhulu iphelelwe lixhala. “Kuyasikhathaza ukudlala namaqela amakhulu kwimidlalo yethu emihlanu yokuvulala isizini. Kulandela iSundowns. Siza kuqubisana nayo ngokufanayo nePirates.

“Asizukuya emdlalweni sizibambile. Siza kulwa nayo ngaphandle koloyiko. Andikhathali nokuba leliphi iqela, malize sidibane. Kuyalinganwa ebaleni,” utshilo uMammila owaziwa ngokuwadelela amaqela amakhulu. Ngaphandle kwamathandabuzo, iChippa United iza kwamkela iSundowns emdlalweni weDStv Premiership ongentsimbi yesibhozo ebusuku ngoMgqibelo ikhuthazekile emva kokudlala kakhule emdlalweni ogqithileyo. Ubancomile abadlali bakhe umqeqeshi weChippa – kodwa wathi bekufanele ukuba bayibethe nokuba kungamagowuli amathathu iPirates. “Makhe sithethe inyaniso, leliphi iqela ebelinamathuba amathathu acacileyo? Sibaphe igowuli elilula nabo basipha igowuli elilula.

“Ndicinga ukuba mithathu ngoku imidlalo esingakwazanga ukusebenzisa amathuba acacileyo. Siyawasokolisa amaqela adlala nathi. Kunzima ukudlala nathi kwaye asizimiselanga ukuphuca kule isizini. Amakhwenkwe wam azimisele ukuqubisana ngqo nalo neliphi iqela eliphambi kwethu. Siza kuwafumana amagowuli kungekudala. Ndibaqhwabela izandla abadlali bam ngoba badlale ngendlela ebesicwangcise ngayo. Ngoku sijonge umdlalo olandelayo,” utshilo uMammila emva komdlalo. Nangona abadlali beChippa bekhuthazekile – kodwa kwakufuneka baxhobe bafohlele phambi kokudibana neSundowns evuthulule iGolden Arrows ngamagowuli amane eqandeni ekuqaleni kwale veki eLucas Moripe Stadium. Iya eGqeberha ikhangela impumelelo yesine kwiDStv Premiership.