IMamelodi Sundowns idlulele kumjikelo olandelayo weTelkom Knockout emva kokubetha iChippa United ngo’4-3 kumapenela emdlalweni obunzima macala eNelson Mandela Bay Stadium emalanga namhlanje. Umdlalo uphele amaqela omabini ebambene ngo’2-2. Kwixesha elongezelelweyo, iChippa United idlale ingaphelelanga ngenxa kaTercious Malepe onikwe ikhadi elibomvu. Abalandeli bagoduke bexolile ngamagowuli amane nomgangatho womdlalo obusezingeni eliphezulu nangoba abadlali bebedlalana rhabaxa. UNorman Mapeza uya kulala exolile yindlela abadlali bakhe abaqhube ngayo emdlalweni namhlanje kunaleyo abadlale ngayo kwiveki ephelileyo ngethuba bebethwa yiHighlands Park. Nangona uPatrick Tignyemb engoyena nozinti obexakekile – kodwa naye uDenis Onyango uzivile izithonga zabadlali beChippa United eza kudlala neKaizer Chiefs ngoLwesithathu kwiveki ezayo eBhayi.
Siphele isiqingatha sokuqala iChippa United iphala phambili ngegowuli elinye eqandeni. Indoda ebhakuzelise umnatha emzuzwini wesibhozo umdlalo uqalile ibe yifolosi yaseNigeria, u-Augustine Kwem. Ligowuli elibakhuthazileyo kakhulu elo abadlali beChippa. Omabini amaqela ebehlasela – kodwa iMamelodi Sundowns lelona qela ebelinamandla futhi linamathuba acacileyo. UGaston Sirino noMauricio Affonso baphantse bamfaka engxakini uPatrick Tignyemb ezipalini izihlandlo eziliqela. Iphantse yalifumana igowuli lokulinganisa iDowns – kodwa abadlali beChippa emva bakwazile ukumelana noxinizelelo.
Isiqingatha sesibini siqale ngendlela enika umdla kakhulu ngokufanayo nesokuqala. USirino ufake igowuli leSundowns elinganise ngalo emva kokuwiswa kukaPhakamani Mahlambi ngendlela engacacanga kakuhle. Iqhubele phambili iSundowns nokubeka uxinizelelo. USilas Maziya ufake ibhola ehambe phezulu emshiye ethe natya uDenis Onyango – yatsho yakhokela kwakhona iChippa United emdlalweni. USirino ufake igowuli lakhe lesibini emzuzwini wamashumi asixhenxe nesibhozo. UTignyemb uphuncule ibhola isuka kuThapelo Morena ekunene. ULyle Lakay, uSibusiso Vilakazi noMahlambi ngabanye babadlali abayikhathazileyo iChippa emva. UWilliam Twala uqabelise ibhola emva kokudlalelwa kakuhle nguLehlogonolo Masaleza emzuzwini wamashumi asibhozo.
Kwimizuzu yokugqibela, uMhlambi noTeboho Langeman bakhe bazama ukunkqonkqoza kwiipali zeChippa. Usompempe akayinikanga iSundowns ipenela umdlali weChippa eyibambe ngesandla ibhola ebhokisini. Kuyiwe kwixesha lokuphumla emva kokuba amaqela engakwazanga ukuphumelela. Kweminye imidlalo yeTelkom, iKaizer Chiefs ibethe i-Orlando Pirates ngo’4-2 kumapenela emva kokubambana ngo’2-2 emdlalweni. Yona iGolden Arrows ibethe iSuperSport United ngo’1-0 emdlalweni obubanjelwe eMbombela Stadium ebusuku izolo. Kanti ngoLwesihlanu ebusuku, iMaritzburg United yabetha iHighlands Park ngo’3-2 kumapenela emva kokuba umdlalo obuphele ngo’1-1.
Chippa: Patrick Tignyemb, Gerald Modisane, Frederic Nsabiyumva, Kevin Moyo, Elvis Moyo, Tercious Malepe, Xolani Mahola, Lehlogonolo Masalesa, Silas Maziya, William Twala, Augustine Kwem.
Sundowns: Denis Onyango, Tebogo Langerman, Thapelo Morena, Motjeka Madisha, Tiyani Mabunda, Mosa Lebusa, Gaston Sirino, Ali Meza, Sibusiso Vilakazi, Mauricio Affonso.
UDanny Jordaan uphawula ngekamva likaDesiree Ellis