IFree State Stars ikrazule iintliziyo zeSiwelele

IFree State State iphumelele gqathu idabi lobukhaya lakwiphondo laseFree State ngethuba idlala neBloemfontein Celtic kumdlalo we-Absa Premier Soccer League ngempela veki.

Igowuli elihle elifakwe nguLucky Mohomi kwisigaba sokuqala somdlalo lilo elinike iFree State Stars impumelelo ka’1-0 kumdlalo obumhle ngeyona ndlela eGoble Park Stadium.

Ibethe iCeltic eyingqongqo yamaqela adlala kwiPSL mva nje engaphumelelanga phantse yonke imidlalo emihlanu phantsi komqeqeshi ofike ekupheleni konyaka ophelileyo, uSerame Letsoaka.

Ngumdlalo wesibini lo iStars iwuphumelela phantsi kwalo mqeqeshi wayo mtsha, osuka kwilizwe lase-Italy. Yona iCeltic ibethwe ityeli lesithathu ngoku elandelelana emva kokubethwa kwiveki ephelileyo yiKaizer Chiefs enkundleni yayo ngo’1-0. Ilwe kwamdaka isali iFree State noxa bekungelulanga ukumelana nabadlali beCeltic abadlala ibhola ebalekayo nabanobuchule bokudlala ibhola.

ULetsoaka, umqeqeshi weCeltic, ucule iculo elinye nelo alicule kwimidlalo yangaphambili – ukuyekwa kwamathuba ngabadlali bakhe. Abadlali abafana noNyatama, uMassa noLamola bazamile ukuqhekeza udonga lweFree State amatyeli aliqela kodwa boyiswa.

Umqeqeshi weFree State State, indoda efikayo kweli lizwe ebizwa ngokuba nguGiovanni Solinas, uwavuyele amanqaku amathathu kodwa wabe evuma kwangaxeshanye ukuba bekunzima kakhulu.

“Ndonwabile kakhulu, ndibukhathazeka yindlela esiqhube ngayo kwezinye iindawo – kodwa ndixoliswe kakhulu yindlela esidlale ngayo phaya ngasemva,” utshilo uGiovanni.

Njengokuba la maqela edlale kakhulu kulo mdlalo, ngoonozinti bamacala omabini abathe benza umahluko kakhulu. UDaouda Diakite, unozinte weFree State, nguye ochongwe njengoyena mdlali obaleseleyo kulo mdlalo ngenxa yomsebenzo omkhulu awenze kuzo zozibini izigaba.