Njengokuba iFree State Stars kuphelile ngayo kwiPremier Soccer League emva kokuthengiswa kwayo kwiveki ephelileyo, i-Orlando Pirates ifumene ithuba lokutyhuthula abadlali bayo abadlale kakuhle kwisizini ephelileyo.
Ifolosi ye-Ea Lla Koto, * -Ayanda Nkosi, ngumdlali wesithathu othathwe liBhakaniya kwisithuba nje seveki. Lo mdlali ulandela uJustice Chabalala noSello Japhta abatyikitywe yiPirates ngobusuku bangoLwesibini kwiveki ephelileyo.
Nangona kungekenziwa sibhengezo yiPirates, uNkosi ukhethe ukuzithi pahaa kwikhasi lonxibelelwano uFacebook ezi ndaba ngenxa yemincili. Ngokutsho kwakhe lo mdlali, utyikitye iminyaka emithathu yesivumelwano sengqesho neBucs.
Le folosi, ineminyaka engamashumi amabini anesithathu, ifake amagowuli amahlanu phantsi kwegama layo kwisizini ephelileyo emva kokudlala imidlalo engamashumi amabini anesibhozo kwiFree State Stars. Umqeqeshi omtsha wePirates, uMuhsin Ertugral, uqokelela iqela labadlali elizakuthi lincumise izigidi zabalandeli bePirates xa ifinca unyaka wamashumi asibhozo ikhona.
UNkosi uzakukhuphisana phaya phambili nabadlali abafana noThamsanqa Gabuza noThabiso Khutumela owenze iziqwenga ngethuba edlalela iBaroka FC kwiNational First Division kwisizini edlulileyo. Kanti ke abadlali beFree State akulindelekanga basokole ngoba nesekela mqeqeshi, uBradley Carnell, abasebenze nalo kwisizini ephelileyo lilapha kwiPirates.
Abadlali abafana noSifiso Myeni, uLehloholo Majoro noThandani Ntshumayelo kuthiwa bakuluhlu lwabadlali abahambayo kwiPirates phambi kwesizini entsha.
Kulindeleke ukuba inxalenye yabadlali abatsha babonakale kumdlalo weCarling Black Label ophakathi kwayo iPirates neKaizer Chiefs ngomhla wokugqibela kule nyanga eFNB Stadium.
IPirates ifuna isiqalo esitsha emva kokubuya nelize kwisizini ka’2015/16 phantsi kuka-Eric Tinkler ongumqeqeshi weCape Town City ngoku.
Kubanjwe abathathu ngezityholo zokuxhwila nokuqweqwedisa