Emva kweenyanga ezimbini uMongameli weNetball South Africa, uCecilia Molokwane ejikeleza nendebe amaphondo onke ngelizama ukucela inkxaso ebantwini, itumente ide yafika. Ngamazwe alishumi elinesithandathu aza kukhuphisana kwitumente yehlabathi (Netball World Cup 2023) eza kuqala ngoLwesihlanu eKapa kwiphondo leNtshona Koloni. Kuloo maqela, iAfrika iza kumelwa ngamazwe aquka uMzantsi Afrika, Uganda, iMalawi neZimbabwe.
Itumente yehlabathi iza kuvulwa ngokusesikweni eCape Town Convention Centre ngomdlalo omkhulu ekulindeleke utshise bhe phakathi kweSPAR Proteas neWales kuGroup C. Embalini yomdlalo womnyazi ekumashumi amathandathu eminyaka, itumente yehlabatho yomnyazi iyaqala ukusingathwa lilizwe lase’Afrika.
Amazwe ajongwe ngamehlo abomvu nekulindeleke ukuba abe ngumqobo endleleni yoMzantsi Afrika aquka iAustralia, iNgilane neNew Zealand eziintshatsheli ezikhuselayo emva kokuziqaqambisa kwitumente yango2019, eNgilane. UMzantsi Afrika, odlale izihlandlo ezilishumi kwitumente yehlabathi, unxanelwe ukuphakamisa eyona ndebe ebalulekileyo emdlalweni womnyazi. Uya kwitumente yalo nyaka uthembele ngabadlali abasemgangathweni ophezulu abaquka uBongiwe Msomi, uKarla Pretorius, uKhanyisa Chawane noPhumza Maweni oza kudlala indebe yakhe yehlabathi yokugqibela kowabo eKapa.
Iinkokeli zeNetball South Africa zikawuleze zabuyisa uNorma Plummer zakubona ukuba amalungiselelo awahambi kakuhle kunyaka ophelileyo. UNorma ngumqeqeshi ohlonitshwayo kakhulu. Abadlali abafana noMaweni baya kuvuyela ukusebenza naye.
“Kufuneka siqhube kakuhle kwitumente esekhaya. Abantu balindele lukhulu kuthi ngoba sidlalela ekhaya. Siyazi kakuhle lonto. Okubalulekileyo kukudlalela ukubulala kwanto ephambi kwethu. Sizimisele ukujongana nomdlalo omnye ngexesha futhi siqinisekise ukuba sidlala umdlalo ophucukileyo,” utshilo uMaweni odlala emva.
‘’Ndikhulele kweli qela (SPAR Proteas). Kumnandi kum ngoba ndiza kudlalela phambi kwabantu bam, eKapa. Ndavakalelwa kakhulu ndakubona igama lam eliza kudlala ngenxa yembali ende kweli qela lesizwe. Ndiye ndadlala ngokuzimisela ukuze ndichongwe ngenxa yeminyaka yam emininzi,” utshilo uMaweni kutshanje. Ethetha nabantu baseMthatha kutshanje, uMolokwane uthe ufuna iSPAR Proteas ivale itumente ngokuphakamisa indebe ngomhla wesithandathu wenyanga ezayo.
Kubanjwe abathathu ngezityholo zokuxhwila nokuqweqwedisa