ABafana Bafana bathe ngcu phezulu kuGroup G emva kokubetha iEthiopia ngegowuli elinye eqandeni (1-0) emdlalweni obuseFNB Stadium ohlahla indebe eQatar kwitumente yehlabathi kunyaka ozayo. Oku kulandela emva kokuba uMzantsi Afrika uhlaze iTopiya phambi kwabalandeli bayo ngemvula yamagowuli amathathu kwelinye emdlalweni obungempelaveki. UHugo Broos ubonise ukubathemba abadlali bakhe noxa bengenawo kakuhle amava ngokuqalisa umdlalo ngabadlali abafana noYusuf Maart, uNjabulo Ngcobo no-Evidence Makgopa ababengawuqalanga umdlalo obuseTopiya kwiveki ephelileyo. Emva konyaka abalandeli bengasangeni emabaleni ngenxa yeKhorona, namhlanje iSafa ifake amawaka amabini abalandeli esele begonyiwe.
ABafana Bafana bakhokele kwangoko kwisigaba sokuqala somdlalo emva kokuba uGetaneh Kebede ebinze umkhonto ekhaya ngebhola yentloko kaVictor Letsoalo isuswe ekoneni nguMaart. Izamile iTopiya ukudala amathuba – kodwa iinzame zayo aziphumelelanga. Iindwendwe ziqale isigaba sesibini somdlalo zinomsebenzi omkhulu phambi kwazo kwabe kunyanzelekile zifumane impumelelo ukuze zandise amathuba wazo okuya eQatar. AmaTopiya abuye ngamandla kwisigaba sesibini. Adlale umdlalo omhle kunoweveki ephelileyo – kodwa ebengakwazi ukugqitha kubadlali boMzantsi Afrika emva. UKebede uphantse walifummana igowuli lokulinganisa emva kokufumana amathuba kwisigaba sesibini.
Bekufanele ukuba aBafana Bafana balifumene igowuli lesibini ngebhola ebikhatywe nguMakgopa, ngelishwa ifike ethe qwa ezipalini uHamid Suleman oyinqande inqumla umgca. Nangona iGhana ibethe iZimbabwe komnye umdlalo kaGroup G – kodwa uMzantsi Afrika usahamba kakuhle. Emidlalweni emine phantsi kwesandla sikaHugo Broos, aBafana Bafana baphumelele imidlalo emithathu ilandelelana baze badlala ntanganye. Yinto enqabileyo kakhulu leyo kuMzantsi Afrika osoloko usoyisakala xa kujongwe entanjeni emidlalweni ebalulekileyo. Kufuneka uMzantsi Afrika ubethe iGhana neZimbabwe ukuze kucace indlela yawo eya eQatar. Yona iTopiya igoduka iphaca emva kokucanjalaliswa okwesibini nguMzantsi Afrika.
iSundowns ingombe iSibanye emdlalweni obutaka iintlantsi eLoftus Stadium!