Ayacutheka amathuba weKaizer Chiefs okubuyela kwiCAF Champions League. Oku kulandela ukubambana kwayo neMarumo Gallants ngo’1-1 emdlalweni weDStv Premiership obutshisa eFNB Stadium ebusuku namhlanje. Omabini amaqela aye emdlalweni wanamhlanje enxanelwe amanqaku amathathu ukuze anyukele phezulu kwiDStv Premiership. Amakhosi, ancwase indawo yesibini, akhubekile namhlanje kwaye kukhangeleka ngathi aza kunzinyelwa kakhulu ngoba iSuperSport United ne’Orlando Pirates ziyiphumelele imidlalo yazo. Yona iGallants ibikhangela amanqaku anokuyisondeza kumaqela asentla kwayo njengokuba isemsileni. Amakhosi awuthathele kuwo umdlalo kwangoko kwisigaba sokuqala. Oku kuye kwagqanyiswa ngakumbi ligowuli elifakwe nguAshle Du Preez kwimizuzu yokuqala yomdlalo.
Emva kwemizuzu embalwa umdlalo uqalile kwisigaba sokuqala, uDu Preez ufumene elinye ithuba lokungcwaba iMarumo Gallants – kodwa akakwazanga ukubamba kakuhle ibhola ngonyawo lwakhe. Kodwa ilwe kwakuko iMarumo Gallants. Ide yavuzwa nayo ngegowuli elingene ngenxa yempazamo yabadlali beChiefs emva phambi kokutshintshwa kwamacala. URanga Chivaviro ufake igowuli lokulinganisa emva kokuba uBrandon Petersen ethembiselene noDove Esmilson ngebhola endaweni embi. Aphinde ahlasela Amakhosi kwisigaba sesibini ekhangela igowuli lokuphumelela umdlalo. USiyabonga Ngezana ukhe wazama ukufaka igowuli ngebhola ebisuka ngasekoneni – kodwa iye yaphuma ecaleni kweepali kancinci. Emva kokungena kwisigaba sesibini emdlalweni, iChristian Saile Baomboli ukhabele phezulu ibhola ebekufanele uyisebenzise bhetele ephambi kukaWashington Arubi.
Noxa iMarumo Gallants ibivale kakhulu emva kuba ibingafuni ukulahlekelwa linqaku elinye elifumeneyo, ikhe yazama ukuhlasela nayo. UMpho Mvelase uphantse wayibeka endawe entle iMarumo Gallants – kodwa ilinge lakhe khange liphumelele. Emizuzwini yokugqibela, uDillan Solomons uphose elinye ithuba engelincede iChiefs ebidinga impumelelo ukuze ilingane nePirates ebethe iChippa United ngamagowuli amabini. Kweminye imidlalo, iGolden Arrows ibethe iRichards Bay ngamagowuli amabini eqandeni emdlalweni obuseKing Zwelithini Stadium. Yona iSekhukhune United ibethe iMaritzburg United ngegowuli elinye yatsho yaqinisa indawo yayo kwiTop 8. Emva kwemidlalo yanamhlanje, iMarumo Gallants neMaritzburg United ziyalingana ngamanqaku emsileni, zishiywa ngamanqaku amabini yiChippa United.
IPirates idibana neentanga zayo namhlanje kwiMTN8, utsho uSage Stephens!