Ibiyimvula yamagowuli
emdlalweni ekufakwe kuwo isithandathu sonke namhlanje. Umdlalo we-Absa Premiership
obuphakathi kwe-Orlando Pirates neCape Town City uphele ebambene amaqela
ngamagowuli amathathu macala (3-3) e-Orlando Stadium. Njengokuba umdlalo oba phakathi
kwePirates neCity usoloko utak’iintlantsi – nalo wamhlanje khange ubadanise
abalandeli bebhola ekhatywayo. Amakhwenkwe kaBenni McCarthy aphale phambili
kwangoko emdlalweni ngamagowuli amabini afakwe nguThabo Nodada noKermit
Erasmus. Ezimnyama ziye zabuya ngamandla zafumana amagowuli okulinganisa afakwe
nguHappy Jele noTshegofatso Mabasa. Ukufakwa kwamagowuli amane kwisigaba
sokuqala kucacise gca iingxaki anazo la maqela omabini ngakumbi phaya ngasemva.
Abadlali
bePirates basemva bebethwele ubunzima ngoba uMpho Makola noFagrie Lakay bebefun’into
ebilapha. Unozinti weBucs ofike phambi kwale sizini, uJoris Delle, kuye
kwanyanzeleka ukuba asebenze ngokuphindeneyo emdlalweni nakubeni uXola Mlambo
noMabasa bebezama ukuhlasela. Kwisigaba sesibini somdlalo, iPirates ihambe
phambili ngegowuli efakwe ngu-Alfred Ndengane emva kokunikelwa nguKabelo
Dlamini emzuzwini wamashumi amahlanu anesixhenxe. Kuye kwabonakala ngathi
izinto zicalanye kwiPirates kwaye nonozinti wayo ebedlala kakuhle ezipalini
kodwa iye yahluthwa intlaka isemlonyeni. Emva kokuzama ukuhlasela ixesha
lomdlali selithande ukukekela – uRoberts ubhakuzelise umnatha. Ngalo ndlela
iCity nePirates zaba zabelana ngenqaku elinye macala.
African News Agency (ANA)
Kuvulwe isikolo esixabisa iR106-million KwaMaxhama