Namhlanje iChippa United yamkela iMamelodi Sundowns kumdlalo we-Absa Premier Soccer League ngo’19:30, eSisa Dukashe Stadium. IiChilli Boys ziya kulo mdlalo zinethemba lokuphumelela umdlalo wazo wesibini kulo nyaka mtsha emva kokubetha iBaroka FC ngo’2-1 kumdlalo obuseNelson Mandela Bay Stadium kwiveki ephelileyo.
Eli qela lizinze eBhayi alikayibethi iSundowns ukusukela oko langena kwinqanaba eliphezulu kwibhola ekhatywayo. Ukubetha kwalo iiBrazillians kungazifunqula iinzame zalo zokonyukela phezulu kwiPSL.
Lona iqela likaPitso Mosimane, iMamelodi Sundowns, liza eMonti imisila iphezulu emva kokuhlaza i-Orlando Pirates ngo’6-0 kumdlalo wePSL obuseLoftus Stadium kwiveki ephelileyo. Ngenxa yokuxinana kwemidlalo yayo iSundowns, uJingles uthe uzakulitshintsha iqela labadlali elizakuqala umdlalo ngenxa yomdlalo obalulekileyo neTP Mazembe weCaf Super Cup ongoMgqibelo eLucas Moripe Stadium.
Abadlali abafana noTeko Modise no-Asavela Mbekile kulindeleke bafumane ithuba lokuqala umdlalo. Ukuphumelela kwazo iintshatsheli zePSL ezikhuselayo lo mdlalo, lo nto iyakuzithatha izibeke kwindawo yesibini kuluhlu lwamaqela adlala kwiPSL. Kuninzi okudlalelwa kulo mdlalo kwaye kulindeleke utshise ngenxa yesitayile asisebenzisayo la maqela omabini xa edlala.
Libanjelwe isatifikethi sikaGrade 12 somgunyathi iGosa lezeMpilo