IKenya ifumene itumente yokuqala yeeSevens

Asiyonto entle ukubamba kwindawo yesithathu kwiBlitzbokke kwitumente yeSingapore Sevens, ngeCawa, kodwa ibikhona into ibincumisa ilizwekazi lase-Afrika ngokubanzi.

IKenya iphumelele itayitile yokuqala ezimbalini kwiiSevens ngeCawa emva kokubetha iFiji ngo’30-7 kumdlalo wamagqibela kankqoyi weSingapore Sevens.

Sele ikwitumente eziyi-114 iKenya phambi kwale mpumelelo. Babethwa kwimidlalo yamagqibela kankqoyi e-Adelaide ngo2009 naseWellington ngo2013.

IKenya ibihamba phambili ngo’20-0 phambi kokuba kuyiwe ekhefini, emva kokungqengqa emgceni kwabadlali bayo amatyeli amane. Khange bavume lubaphazamise uxinizelelo abalufakwe yiFiji kwisiqingatha sesibini. UCollins Injera uphinde wongeza amanqaku alishumi wafumana iwonga lokuba ngoyena mdlali ugqamileyo kulo mdlalo.

U-Injera ibenguye nohlangule iKenya kumdlalo ubuphambili kwamagqibela kankqoyi, phakathi kweKenya neArgentina. Kwelinye icala iBlitzboks zigqibe kwindawo yesithathu emva kokubetha i-Argentina ngo’28-0.

IBlitzbokke zidlale imizuzu emihlanu phambi kokuba ziwele umgca kulo mdlalo, kodwa emva koko baye balandelelana abadlali ukulala emgceni. UKwagga Smith, uSiviwe Soyizwapi, uStephan Dippenaar noRuhan Nel baze namanqaku amahlanu umdlali ngamnye.

Njengesiqhelo uSeabelo Senatla udlale indima enkulu ukuncedisa iBlitzbokke ingakumbi ukusebenzisa isantya athenjwe ngaso.

Amanqaku alishumi elinesixhenxe afunyenwe ziiBlitzbokke kule mpelaveki kodwa ayalinyusa iqela likaNeil Powell libuyele kwindawo yesibini, kumaqela eSevens kwihlabathi.