Umqeqeshi weLions, uJohan Ackermann, ufuneme kanye le nto ebeyifuna kule mpelaveki. Kaloku iqela lakhe livuthulule iKings yaseMpuma Koloni ngo’42-19 kumdlalo eliwudlale kakuhle kakhulu kwisigaba sokuqala eNelson Mandela Bay Stadium izolo emalanga. Lo ka-Ackermann ebefuna amanqaku amahlanu phambi kokumdlalo omkhulu phakathi kweLions neSharks kwimpelaveki ezayo kwibala lembali i-Ellis Park Stadium.

Oyena mdlali othe wadlala umdlalo ophucukileyo kunabanye abadlali beLions nguMichael Tambwe – othe walala emgceni izihlandlo ezibini. IKings zidlale kakuhle kwiveki ephelileyo ngethuba zidlala eThekwini nangoba ziphethe zibethwa. Nakulo umdlalo wayizolo – iKings zidlale kakuhle, isebenzisa ngqo iimpazamo ezenziwe ngabadlali beLions kwisigaba sesibini somdlalo. Kulo mdlalo wombhoxo, liqela ebelidlalela ekhaya elilele emgceni kuqala ngebhola ebekwe ngu-Andile Ntsila osike amadoda phambi kokulala emgceni ngomzuzu wokuqala. IKings zijongisa imibombo kwela se-Australia kule veki – apho ziza kudlala umdlalo weSuper Rugby.

Komnye umdlalo weSuper Rugby: iJaguares ibethe iQueensland Reds ngo’22-8 kumdlalo obuseBuenos. Zona iCheetahs ibethe iSharks ngo’38-30 kumdlalo obuseBloemfontein. IStormers iphumelele ngo’44-31 kumdlalo ebethe kuwo iSunwolves, eSingapore izolo.