Umqeqeshi weBorder Women’s Rugby, uNwabisa Ngxathu, ufunge wamunc’intupha ngelithi iqela lakhe liza kuziphindezela kwiWestern Province.
UNgxathu usenze esi sifungo emva kokuba iqela lakhe lizibekele indawo emdlalweni wamagqibelakankqoyi kwiveki ephelileyo.
Amanenekazi eBorder ahlaze amanenekazi eBoland ngokuwabetha kanobom ngo’54-0 emdlalweni we-Inter-Provincial League obusePolice Park kwimpelaveki egqithileyo. UNgxathu uthi ivakele imithandazo yabo.
“Kudala ndifuna siphinde sidlale neWestern Province. Iyakrokrisa indlela esibethe ngayo kumlenze wokuqala kule tumente. Nakule minyaka mibini idlulileyo sibethwe yiyo emdlalweni wamagqibelakankqoyi. Siza kuziphindezela kulo nyaka. Kudala siyifuna,” uNgxathu utshilo.
Ephefumla emva kokuba iBorder ibethe iBoland, uNgxathu uthethe wenjenje: “Badlalile abantwana namhlanje. Zincinci iimpazamo abazenzileyo. Siza kuzilungisa ngoba siyayifuna le ndebe.” Yena umqeqeshi weBoland, uThomas Chowles, uwancomile amanenekazi eqela lakhe nangona libethiwe.
“Besiyilindele le nto yenzeke apha. IBorder lelinye lamaqela aphezulu kule tumente. Kodwa mandibancome abadlali bam, balwile nangona bekungekho lula,” utshilo uChowles. OkaChowels uthi eyonanto ebebeyijongile kulo nyaka ibikukwakha iqela. “Ibembi kakhulu isizini yethu kulo nyaka ngoba khange siphumelele namnye umdlalo. Kodwa andikhali ke ngoba basebancinci abadlali bethu. Injongo yethu kule sizini ibikukwakha iqela. Iyenzeka lo nto,” utshilo uChowles.
IBorder iza kungquzulana neWestern Province eKapa ngomhla wesixhenxe kweyoMsintsi ngentsimbi yesithathu.
UMalusi waseDutywa ubuye encumile kwiTCS London Marathon!