Imbali kwiHighlands Park ngokungena kwiMTN 8

Kwenzeke imbali kule veki ebholeni ekhatywayo eMzantsi Afrika ngethuba iHighlands Park ingena kwisigaba sokugqibela seMTN 8 emva kokubetha iPolokwane City ngo’4-3 kumapenela emdlalweni obubanjelwe eMakhulong Stadium.

Kokokuqala iHighlands Park ifumana ithuba lokulwela indebe kwiPSL ukusukela oko yathi yanyuselwa kunyaka ophelileyo.

Ngaphandle kwamathandabuzo, ukuqeqeshwa ngumqeqeshi onamava ebholeni njengomntu ofana no-Owen Da Gama,

kuyincedile iHighlands Park nakubeni ukuqokelela kwayo abadlali abanesakhono, abazimiseleyo nabanamava ingezozinto ezinokusengelwa phantsi.

Endleleni yeHighlands eya emdlalweni wokugqibela wolona khuphiswano olunomtsalane, iMTN 8, iguqise phantsi amaqela ahlonitshwayo njengeCape Town City ngo2-0, yalandelisa ngeOrlando Pirates ngo’1-0 phambi kwePolokwane City egolozileyo emdlalweni emibini ephele kungafakwanga igowuli kuyo.

UDa Gama, obemincile ngethuba kukhatywa amapenela, uzamkele iziphumo zomdlalo kodwa wavuma ngelithi iqela lakhe lisokole.

Ngoku iHighlands Park iza kuzama ukuqokelela amanqaku apheleleyo emdlalweni weAbsa Premiership eza kudibana kuwo neBaroka FC ngentsimbi yesithathu ngeCawe ePeter Mokaba Stadium.

Emidlalweni emine eyidlalileyo iHighlands Park, idlale ntanganye kwemibini, iphumelele kanye phambi kokubethwa komnye.

Yona iBaroka idlale imidlalo emihlanu. Ibethwe kabini, yadlala ntanganye kwemibini yaze yaphumelela komnye umdlalo.

Imidlalo yePSL:

NgoMgqibelo: Polokwane City vs SuperSport United @Old Peter Mokhaba Stadium, 15:00;

Stellenbosch vs Black Leopards @Athlone Stadium, 15:00; Chippa United vs Bloemfontein Celtic @Nelson Mandela Bay Stadium, 15:00;

Mamelodi Sundowns vs Maritzburg United @Lucas Moripe Stadium, 18:00;

Bidvest Wits vs Orlando Pirates@Moses Mabhida Stadium, 20:15

NgeCawe: Cape Town City vs Golden Arrows@Cape Town Stadium, 15:00;

Baroka FC vs Highlands Park@Peter Mokaba Stadium, 15:00